 |  ڈبگری بازار کے رہائشی موسیقاروں اور دیگر انے بجانے والے کو وہاں سے بے دخل کرنے کا مطالبہ کر رہے ہیں |
پشاور کے قدیمی ڈبگری بازار کو موسیقاروں اور گائیکوں سے پاک کرنے کی مہم جاری ہے اور اس علاقے کے رہائشیوں نے اب اپنی اس مہم کو نہ صرف جاری رکھنے بلکہ اس کے ساتھ ساتھ اسے مزید وسعت دینے کا اعلان کیا ہے۔ علاقے کے تقریبا دو درجن سے زائد رہائشی افراد نے آج سیاہ پرچم اور احتجاجی بینرز اٹھائے شہر کی مختلف سڑکوں پر مارچ کیا اور بعد میں ایک اخباری کانفرنسں سے خطاب بھی کیا۔ تحریک نجات فحاشی کے نام سے بنائی گئی تنظیم کے رہنماوں نے اس موقع پر اعلان کیا کہ وہ اپنی مہم مطالبات کے منظور ہونے تک جاری رکھیں گے۔ انہوں نے اس مسئلے کے حل کے لئے حکومتی کوششوں پر بھی عدم اطمینان کا اظہار کیا۔ اس مہم میں پاسبان تنظیم نے بھی تحریک کا ساتھ دینے کا فیصلہ کیا ہے۔ پاسبان کے صوبائی سربراہ قاری مصاحب گل محب کو اس موقع پر شکایت تھی کہ نہ تو حکومت اور نہ ہی مقامی انتظامیہ اس سلسلے میں کچھ کر رہی ہے۔ ’جب حکومت خاموش ہے، انتظامیہ بے نیاز ہے تو عوام کو تو خود ہی باہر نکلنا ہے۔‘ اپنی تحریک کو انسانی حقوق کی تنظیمیوں کے لئے پرکشش بنانے کی خاطر مقررین نے ڈبگری کے فنکاروں پر بچوں سے ناچ گانا کرانے کا الزام بھی لگایا اور اسے بند کرانے کا مطالبہ کیا۔ تحریک کے رہنماؤں کا کہنا تھا کہ وہ آئندہ چوبیس گھنٹوں تک ان فنکاروں کے بیدخل نہ کئے جانے پر بھوک ہڑتال اور جلسے جلوس شروع کر دیں گے۔ دوسری جانب اس بازار سے منسلک فنکار فحاشی کے الزام کی تردید کرتے ہیں اور ان کا موقف ہے کہ وہ طویل عرصے سے یہاں کاروبار کر رہے ہیں اور کرتے رہیں گے۔ | 
یہ صفحہ دوست کو ای میل کیجیئے
پرِنٹ کریں
