جنگ گروپ کے ڈائریکٹر پشاور سے اغوا
،تصویر کا ذریعہFacebook
پاکستان کے صوبہ خیبرپختونخوا کے دارالحکومت پشاور میں پولیس کے مطابق پاکستانی میڈیا ہاؤس ’جنگ گروپ‘ کے ڈائریکٹر کوآرڈینیشن عابد عبداللہ کو نامعلوم افراد نے اغوا کر لیا ہے۔
اُن کے اغوا کا مقدمہ درج کر کے تحقیقات شروع کر دی گئی ہیں۔
جنگ گروپ کی انتظامیہ کا کہنا ہے کہ بدھ کی شب رات تین بجے کے قریب عابد عبداللہ پشاور کے علاقے حیات آباد میں جنگ کے پریس سے نکل کر ہوٹل جا رہے تھے کہ چھ سے آٹھ مسلح افراد نے انھیں یرغمال بنایا۔
عابد عبداللہ کا تعلق لاہور سے ہے اور جنگ گروپ کے مطابق انھیں لاہور سے پشاور پہنچنے کے بعد نامعلوم افراد نے اغوا کیا۔
عابد عبداللہ کے ڈرائیور ظفر حسین نے پولیس کو بتایا کہ حملہ آور دو گاڑیوں میں سوار تھے اور حیات آباد کے علاقے میں انھیں نامعلوم افراد نے روکا اور تین افراد گاڑی میں بیٹھ گئے۔
حیات آباد پولیس کو دیے گئے ڈرائیور کے بیان کے مطابق اغوا کاروں نے ایک مقام جا کر گاڑی رکوائی اور عابد اللہ کو اپنے ساتھ لے گئے۔
اغوا کاروں نے عابد عبداللہ اور ڈرائیور کا موبائل فون بھی اپنے قبضے میں لے لیا۔
پولیس نے ڈرائیور کے بیان کے بعد نامعلوم افراد کے خلاف عابد عبداللہ کے اغوا کی ایف آئی آر درج کر لی ہے۔
End of سب سے زیادہ پڑھی جانے والی
جنگ گروپ کے مطابق خیبر پختوانخوا کے آئی جی ناصر خان درانی کا کہنا ہے کہ اس مقدمے کی تفتیش سینیئر پولیس افسران کر رہے ہیں اور توقع ہے کہ جلد عابد عبداللہ کو بازیاب کروا لیا جائے گا۔
یہ پہلی مرتبہ نہیں ہے جب کسی صحافی یا صحافتی اداروں سے وابستہ افراد کو اغوا کیا گیا ہے۔ ماضی میں بھی کوئٹہ، پشاور اور اسلام آباد سمیت مختلف شہروں میں صحافیوں کے اغوا کے واقعات پیش آچکے ہیں۔
