خیبر ایجنسی سے تین افراد کی لاشیں برآمد
،تصویر کا ذریعہAFP
- مصنف, عزیز اللہ خان
- عہدہ, بی بی سی اردو ڈاٹ کام، پشاور
پاکستان کے قبائلی علاقے خیبر ایجنسی میں جمرود کے علاقے سے تین افراد کی لاشیں ملی ہیں جن کی تاحال شناخت نہیں ہو سکی ہے۔
پولیٹکل انتظامیہ کے اہلکاروں نے بتایا کہ تینوں افراد کی لاشیں جمرود ہسپتال پہنچا دی گئی ہیں۔
یہ لاشیں جمرود میں پشاور کی سرحد کے قریب شاکس کے علاقے سے ملیں۔
اہلکاروں نے بتایا کہ انتظامیہ ان لاشوں کی شناخت کی کوشش کر رہی ہے۔
مقامی ذرائع نے بتایا کہ ہلاک ہونے والوں کی عمریں 25 سے 30 سال کے درمیان ہیں اور ان میں سے دو کے جسموں پر گولیوں کے علاوہ تشدد کے بھی نشانات ہیں جب تیسرے کو گولی مار کر ہلاک کیا گیا۔
پولیٹکل انتظامیہ کے اہلکار نے بتایا کہ اب تک یہ معلوم نہیں ہو سکا کہ ان تینوں افراد کو کس نے مارا ہے اور یہ لاشیں یہاں لائی گئی ہیں یا انھیں اسی جگہ پر قتل کیا گیا ہے۔
End of سب سے زیادہ پڑھی جانے والی
خیبر پختونخوا کے ضلع نوشہرہ کے قریب جمعرات کو بھی تین افراد کی لاشیں ملی تھیں جنھیں گولیاں مار کر ہلاک کیا گیا تھا۔ ان میں سے ایک امام مسجد بتائے گئے تھے۔
پشاور کے پھندو روڈ پر چند روز پہلے ایک امام مسجد کو ان کے بیٹے سمیت فائرنگ ککے ہلاک کر دیا گیا تھا۔
امام مسجد کا تعلق نوشہرہ کے قریبی علاقے اکوڑہ خٹک سے بتایا گیا تھا۔
