شیخوپورہ میں پولیس مقابلہ، آٹھ مبینہ شدت پسند ہلاک
،تصویر کا ذریعہAFP
پاکستان کے صوبہ پنجاب کے ضلع شیخوپورہ میں پولیس نے ایک مقابلے میں آٹھ مبینہ شدت پسندوں کو ہلاک کرنے کا دعویٰ کیا ہے۔
پولیس ذرائع کے مطابق یہ مقابلہ بدھ اور جمعرات کی درمیانی شب کو شرق پور کے علاقے میں ہوا جہاں پولیس نے ایک اطلاع پر چھاپہ مارا۔
صحافی عبدالناصر کے مطابق پولیس کو اطلاع ملی تھی کہ کچھ شدت پسند شب معراج کے موقع پر دہشت گردی کی منصوبہ بندی کر رہے تھے۔
جب پولیس وہاں پہنچی تو مبینہ شدت پسندوں نے پولیس پر فائرنگ شروع کردی تاہم جوابی فائرنگ میں آٹھ مشتبہ شدت پسند ہلاک ہوگئے۔
پولیس نے جائے وقوع سے چار کلاشنکوف، چار پستول، چھ کلوگرام دھماکہ خیز مواد اور چار موٹر سائیکلیں بھی قبضہ میں لے لیں۔
End of سب سے زیادہ پڑھی جانے والی
خیال رہے کہ اس سے پہلے فروری میں بھی شرق پور کے علاقے میں اسی طرح کے ایک مبینہ مقابلہ میں پولیس نے سات مشتبہ شدت پسندوں کو ہلاک کیا تھا۔
لاہور میں گلشن اقبال پارک میں بم دھماکے کے بعد پولیس نے شدت پسندوں کےخلاف کارروائیاں تیز کی ہیں۔
پولیس نے گذشتہ مہینے میں بھی لاہور اور شیخورہ کے درمیانی علاقے میں سگیاں پل کے قریب تحریک طالبان پاکستان کے چھ مشتبہ ارکان کو ایک پولیس مقابلے میں ہلاک کرنے کا دعویٰ کیا تھا۔
