کوئٹہ: تبلیغی مرکز میں دھماکہ، ایک ہلاک
،تصویر کا ذریعہBBC World Service
بلوچستان کے دارلحکومت کوئٹہ کے علاقے غوث آباد میں واقع تبلیغی مرکز کے اندر نماز عصر کے دوران بم دھماکے کے نتیجے میں ایک شخص جاں بحق جبکہ درجن سے زائد زخمی ہوگئے جن میں سے بعض کی حالت تشویشناک بتائی جاتی ہے۔
کوئٹہ سے بی بی سی کے نامہ نگار ایوب ترین کے مطابق جمعرات کی شام کو کوئٹہ کے علاقے سیٹلائٹ ٹاؤن میں واقع تبلغی مرکز مسجد فاروقیہ میں شب جمعہ کے لیے جانے والے افراد کی بہت بڑی تعداد تبلیغی مرکز جامعہ فاروقیہ میں موجود تھی اور وہ نماز عصر میں مصروف تھے کہ اس دوران مسجد کے ایک پول کے ساتھ رکھا گیا بم زور دار دھماکے سے پھٹ گیا۔
جس کے نتیجے میں ایک شخص موقع پر جاں بحق جبکہ درجن سے زائد افراد زخمی ہوگئے ۔ زخمیوں اور ہلاک ہونے والے افراد کو فوری طور پر سول اور بولان میڈیکل کامپلیکس ہسپتال کوئٹہ منتقل کردیا گیا۔
جہاں بعض زخمیوں کی حالت نازک بتائی گئی ہے جس کے باعث ہلاکتوں میں اضافے کا خدشہ ہے۔
یہ بلوچستان میں تبلیغی مرکز پر ہونے والے پہلا حملہ ہے ۔
بم دھماکے کے بعد مرکز میں بھگدڑ مچ گئی اور لوگوں کی بہت بڑی تعداد وہاں پہنچ گئی ۔
واضح رہے اس سے قبل سٹیلائٹ ٹاؤن کے علاقے میں مدرسے اور جناح ٹاؤن میں یونیورسٹی کے بس پر ہونے والے حملے بھی مدرسے اور طلباءکو ٹارگٹ کرنے کے پہلے واقعات تھے جن کے بعد اب تبلیغی مرکز کو بھی نشانہ بنایا گیا ہے ۔
واقعہ کی اطلاع ملتے ہی سیکورٹی فورسز اور پولیس نے علاقے کی ناکہ بندی کر کے ملزمان کی تلاش شروع کردی ہے ۔
End of سب سے زیادہ پڑھی جانے والی
