پی آئی اے کے طیارے پر بم کی اطلاع

پاکستان کی سرکاری فضائی کمپنی پی آئی اے کا بوئنگ 777 مسافر بردار جہاز جو پاکستان سے مانچسٹر جا رہا تھا بم کے خطرے کے پیش نظر ترکی میں اتار لیا گیا ہے۔

ترکی کے سرکاری ذرائع ابلاغ میں خبر دی جا رہی ہے کہ طیارہ استنبول کے اتاترک انٹرنیشنل ہوائی اڈے پر اتار لیا گیا ہے۔

طیارے کے عملے کو بلغاریہ کی فضائی حدود میں پرواز کرتے ہوئے طیارے میں بم کی موجودگی کی اطلاع دی گئی۔

پی آئی اے کی پرواز پی کے سات سو نو پر تین سو اٹہتر افراد سوار تھے اور یہ لاہور سے مانچسٹر جا رہا تھا۔

جہاز کے عملے نے استنبول کے کنٹرول ٹاور سے رابطہ کیا اور ہنگامی بنیادوں پر لینڈ کرنے کی اجازت چاہی۔

ترکی کی سرکاری خبر رساں ایجنسی اناتولیہ نے اطلاع دی ہے کہ طیارے کو ہوائی اڈے کے ایک کونے میں کھڑا کر دیا گیا اور جہاز سے مسافروں کو بحفاظت نکال لیا گیا ہے۔

جہاز پر بم کی تلاش کے لیے سونگھنے والے کتوں کو پہنچایا گیا ہے۔

پاکستان کی فضائی کمپنی کا کہنا ہے کہ مسافروں کے سامان اور جہاز کے کسی حصے سے کوئی مشتبہ چیز نہیں ملی ہے۔

تاہم جہاز کی تفصیلی تلاشی کا کام جاری ہے۔

کمپنی کا کہنا ہے کہ جہاز کی تلاشی مکمل ہوتے ہی پرواز اپنی منزل کی طرف روانہ کر دی جائے گی۔

پی آئی اے کے ایک ترجمان نے پریس ایسوسی ایشن کو بتایا کہ بم کی دھمکی پاکستان کے دارالحکومت اسلام آباد میں موصول ہوئی۔