دتہ خیل:ڈرون حملے میں چار ہلاک
پاکستان کے قبائلی علاقے شمالی وزیرستان میں حکام کے مطابق امریکی جاسوس طیارے کے حملے میں چار افراد ہلاک اور دو زخمی ہوگئے ہیں۔
مقامی انتظامیہ کے مطابق امریکی جاسوس طیارے نے شمالی وزیرستان میں دتہ خیل کے علاقے خدرخیل میں ایک گاڑی کو نشانہ بنایا۔ حکام کا کہنا ہے کہ جس جگہ حملہ ہوا وہاں سے افغان سرحد صرف تیس کلومیٹر دور ہے۔
پشاور سے نامہ نگار دلاور خان وزیر کا کہنا ہے کہ حکام نے بتایا کہ جاسوس طیارے سےگاڑی پر تین میزائل فائر کیے گئے، جس کے نتیجے میں چار افراد ہلاک ہو گئے۔
اہلکار نے یہ بھی بتایا کہ حملے میں گاڑی بھی مکمل طور پر تباہ ہوگئی۔
واضح رہے کہ امریکہ نے ان خبروں کے سامنے آنے کے بعد کہ شدت پسند یورپی شہروں پر ممبئی کی طرز کے حملے کرنے کی منصوبہ بندی کر رہے ہیں، پاکستان کے قبائلی علاقوں پر ڈرون حملوں کی تعداد میں اضافہ کر دیا ہے اور یہ اطلاعات بھی سامنے آئی ہیں کہ امریکہ ان حملوں کا دائرہ وسیع کرنا چاہتا ہے۔
تاہم پاکستان نے کہا ہے کہ ڈرون حملوں کے دائرے کو بڑھانا کسی طور پر پاکستان کو قابلِ قبول نہیں ہے اور یہ حملے دہشت گردی کے خلاف مشترکہ کوششوں میں مددگار ثابت نہیں ہو رہے ہیں۔
