انڈین طیارے کی کراچی میں ہنگامی لینڈنگ، مسافر پاکستانی مہمان نوازی سے متاثر
،تصویر کا ذریعہCAA
- مصنف, ریاض سہیل
- عہدہ, بی بی سی اردو ڈاٹ کام، کراچی
شارجہ سے حیدرآباد جانے والی انڈیگو کی پرواز کے ہم تمام مسافر پرواز میں فنی خرابی کے باعث کراچی ایئرپورٹ پر پھنس گئے۔ کراچی ایئرپورٹ حکام کی مہمان نوازی قابل تعریف اور یادگار رہی۔ یہ کہنا ہے انڈین شہری فیروز کا جو اس پرواز میں سوار تھے۔
انڈین فضائی کمپنی انڈیگو کی متحدہ عرب امارات کی ریاست شارجہ سے انڈیا کے شہر حیدرآباد دکن جانے والی پرواز نے اتوار کو علی الصبح کراچی کے بین الاقوامی ہوائی اڈے پر ہنگامی لینڈنگ کی تھی۔ سول ایوی ایشن اتھارٹی پاکستان کے مطابق انجن میں تکنیکی خرابی کی وجہ سے پرواز کو کراچی کی طرف موڑ دیا گیا تھا۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام
انڈیگو نے ایک بیان میں کہا ہے کہ ’شارجہ سے حیدرآباد دکن جانے والی انڈیگو کی پرواز 6E-1406 کا رخ اس وقت کراچی کی طرف موڑ دیا گیا تھا جب پائلٹ نے تکنیکی خرابی دیکھی۔‘
اب اس پرواز کے تمام مسافروں کو انڈیا روانہ کر دیا گیا ہے تاہم اس سے پہلے وہ 12 گھنٹے تک کراچی ایئرپورٹ پر پھنسے رہے۔
پاکستانی سول ایوی ایشن اتھارٹی نے اپنے بیان میں بتایا کہ متبادل طیارہ شام چار بج کر آٹھ منٹ پر صرف عملے کے دو ارکان کو لے کر روانہ ہو گیا جبکہ علی الصبح تکنیکی بنیادوں پر لینڈنگ کرنے والا طیارہ 193 افراد بشمول عملے کے چھ ارکان کے ساتھ شام ساڑھے چار بجے روانہ ہوا۔
،تصویر کا ذریعہcaa
انڈین شہریوں نے پاکستان میں مہمان نوازی پر شکریہ ادا کیا اور بعض نے دوبارہ یہاں آنے کی خواہش کا اظہار بھی کیا ہے۔ سول ایوی ایشن اتھارٹی کی جانب سے مسافروں کو تبصروں کے لیے دیے گئے کارڈز پر ایک مسافر نے لکھا کہ اُنھوں نے ہمارے ساتھ وی آئی پی جیسا اچھا سلوک کیا، میں واقعی میں پاکستان کا شکریہ ادا کرتا ہوں۔
یہ بھی پڑھیے
End of سب سے زیادہ پڑھی جانے والی
شیجین نے لکھا کہ میں یہاں مختصر وقت کے لیے آ کر بہت خوش ہوں ان پیارے لوگوں کے ساتھ رہنا میری خوشنصیبی ہے اور میرا خواب بھی پورا ہوا، تمام مہمان نوازی کا شکریہ۔
،تصویر کا ذریعہCAA
سید خالد نے اپنے کارڈ میں لکھا کہ سٹاف بہت مدد گار تھا، پاکستان حکومت کا بہت بہت شکریہ۔ میں واقعی ایک بار مناسب دستاویزات کے ساتھ یہاں آنا چاہتا ہوں۔
،تصویر کا ذریعہCAA
چند روز قبل بھی ایک انڈین طیارے نے کراچی ایئرپورٹ پر ہنگامی لینڈنگ کی تھی۔
ٹوئٹر پر کراچی میں پرواز اترنے پر طنز و مزاح بھی کیا گیا۔ زین سید لکھتے ہیں کہ لگتا ہے انڈین کپتان بریانی کھانے کے لیے کراچی میں رکتے ہیں۔
،تصویر کا ذریعہSocial Media
ایک اور صارف نے لکھا کہ پائلٹ ہندوستانی حیدرآباد اور پاکستانی حیدرآباد کے درمیان الجھ گیا ہوگا، مذاق کے علاوہ، امید ہے کہ سب محفوظ ہیں۔
،تصویر کا ذریعہSocial Media
طیارے میں سوار انصار نامی مسافر نے تصویر پوسٹ کرتے ہوئے لکھا کہ ہم سب تھکے ہوئے مسافر کراچی ایئرپورٹ پر موجود ہیں کیونکہ انڈیگو کو ہماری پرواز کا متبادل تلاش کرنے میں 12 گھنٹے لگ گئے۔
اُنھوں نے لکھا کہ کراچی کی ایک مکھی بھی ہمارے ساتھ حیدرآباد تک چلی۔
،تصویر کا ذریعہSocial Media
