بیت الخلا سے سیکس کے لمحات کی ویڈیوز تک، سمارٹ چشموں سے بنے مواد کی نگرانی پر میٹا مشکل میں

برطانیہ کے ڈیٹا واچ ڈاگ نے میٹا کو ایک ’تشویشناک‘ رپورٹ کے بعد خط لکھا ہے جس میں دعویٰ کیا گیا ہے کہ آؤٹ سورس کیے گئے کارکنان نے کمپنی کے مصنوعی ذہانت کے سمارٹ چشموں سے فلمائی گئی حساس ویڈیوز دیکھی ہیں۔

میٹا نے کہا کہ سب کنٹریکٹڈ کارکنان کبھی کبھار مواد کا جائزہ لے سکتے ہیں، جن میں فلمیں اور تصاویر شامل ہیں، جو اس کے اے آئی سمارٹ چشموں کے ذریعے ریکارڈ کی جاتی ہیں تاکہ ’تجربے‘ کو بہتر بنایا جا سکے۔

سویڈش اخبارات کی تحقیقات کے مطابق، بعض اوقات کینیا میں قائم میٹا کے سب کنٹریکٹرز چشمہ پہننے والوں کی ویڈیوز کا جائزہ لیتے ہیں، جن میں بیت الخلا استعمال کرنے یا جنسی تعلق قائم کرنے کے مناظر شامل ہوتے ہیں۔

ایک کارکن نے مبینہ طور پر کہا کہ ’ہم سب کچھ دیکھتے ہیں۔۔۔ ڈرائنگ رومز سے لے کر برہنہ جسموں تک۔‘

میٹا نے کہا کہ وہ لوگوں کے ڈیٹا کے تحفظ کو بہت سنجیدگی سے لیتا ہے اور اس شعبے میں اپنی کوششوں اور ٹولز کو مسلسل بہتر بنا رہا ہے۔

ٹیک کمپنی نے بی بی سی نیوز کو بتایا ’رے بین میٹا چشمے آپ کو مصنوعی ذہانت کے ذریعے بغیر ہاتھ استعمال کیے اپنے اردگرد کی دنیا کے بارے میں سوالات کے جواب دینے میں مدد دیتے ہیں۔‘

’جب لوگ میٹا اے آئی کے ساتھ مواد شیئر کرتے ہیں، تو دیگر کمپنیوں کی طرح ہم بھی کبھی کبھار کنٹریکٹرز کو یہ ڈیٹا ریویو کرنے کے لیے استعمال کرتے ہیں تاکہ چشموں کے ساتھ لوگوں کے تجربے کو بہتر بنایا جا سکے، جیسا کہ ہماری پرائیویسی پالیسی میں بیان کیا گیا ہے۔‘

کمپنی نے مزید کہا کہ ’یہ ڈیٹا سب سے پہلے لوگوں کی پرائیویسی کے تحفظ کے لیے فلٹر کیا جاتا ہے۔‘

معاملہ آخر ہے کیا؟

میٹا کے مطابق فلٹرنگ میں تصاویر میں چہروں کو دھندلا کرنا شامل ہو سکتا ہے لیکن اخبارات سے بات کرنے والے ذرائع نے کہا کہ بعض اوقات یہ ناکام ہو جاتا ہے اور لوگوں کے چہرے نظر آ سکتے ہیں۔

صارفین کو ریکارڈنگ کو دستی طور پر یا وائس کمانڈ کے ذریعے فعال کرنا پڑتا ہے، لیکن وہ یہ نہیں جانتے کہ ان کی ویڈیوز اور تصاویر کبھی کبھار انسان بھی دیکھتے ہیں جیسا کہ میٹا کی وسیع پرائیویسی پالیسیوں اور سروس کی شرائط میں بیان کیا گیا ہے۔

بی بی سی کی درخواست کے جواب میں، میٹا نے اپنی خدمات کی شرائط کا لنک فراہم کیا، لیکن یہ واضح نہیں کیا کہ ان شرائط کے کون سے حصے انسانی کانٹریکٹرز کے ذریعے مواد کے جائزے سے متعلق ہیں۔

میٹا کی برطانیہ میں اے آئی سروس کی شرائط میں کمپنی کہتی ہے: ’کچھ صورتوں میں میٹا آپ کی اے آئی کے ساتھ تعاملات کا جائزہ لے گا۔۔۔ اور یہ جائزہ خودکار یا انسانی ہو سکتا ہے۔‘

لیکن برطانیہ کے ڈیٹا واچ ڈاگ، انفارمیشن کمشنر آفس آئی سی او نے بی بی سی نیوز کو بتایا کہ ’وہ ڈیوائسز جو ذاتی ڈیٹا پروسیس کرتی ہیں، بشمول سمارٹ چشمے، انھیں صارفین کو کنٹرول دینا چاہیے اور مناسب شفافیت فراہم کرنی چاہیے۔‘

اس نے ایک بیان میں کہا: ’سروس فراہم کرنے والوں کو واضح طور پر بتانا چاہیے کہ کون سا ڈیٹا جمع کیا جاتا ہے اور اسے کیسے استعمال کیا جاتا ہے۔‘

’اس آرٹیکل میں کیے گئے دعوے تشویشناک ہیں۔ ہم میٹا کو خط لکھیں گے تاکہ یہ جان سکیں کہ وہ برطانیہ کے ڈیٹا پروٹیکشن قانون کے تحت اپنی ذمہ داریوں کو کیسے پورا کر رہا ہے۔‘

سویڈش اخبارات سے بات کرنے والے کارکنان ڈیٹا اینوٹیشن کرنے والے تھے، جو میٹا کے اے آئی کو تصاویر کی تشریح سکھا رہے تھے، یعنی مواد کو خود لیبل کر رہے تھے۔

وہ نیروبی میں قائم ایک آؤٹ سورسنگ کمپنی ساما کے ملازم تھے، جس کا ڈیٹا اینوٹیشن کے کام میں ایک تاریخ ہے۔

بی بی سی نے اس رپورٹ پر تبصرے کے لیے ساما سے رابطہ کیا ہے۔

کارکنان نے کہا کہ وہ اے آئی کے ساتھ ہونے والی بات چیت کے ٹرانسکرپٹس کا بھی جائزہ لیتے تھے تاکہ یہ دیکھ سکیں کہ اس نے سوالات کا مناسب جواب دیا ہے یا نہیں۔

انھوں نے اپنے کام کی جگہ پر پرائیویسی کے تحفظات بیان کیے، جیسے ہر جگہ کیمرے لگے ہونا اور موبائل فونز کی اجازت نہ ہونا۔

لیکن ان کے مطابق، جو مواد وہ دیکھتے تھے وہ اکثر انتہائی حساس ہوتا تھا، جیسے چشمہ پہننے والے افراد کا فحش مواد دیکھنا۔

ایک موقع پر ایک کارکن نے اخبارات کو بتایا کہ ایک شخص کے چشمے بیڈروم میں ریکارڈنگ پر رہ گئے، جہاں بعد میں ایک عورت غالباً اس شخص کی بیوی کو کپڑے اتارتے ہوئے فلمایا گیا۔

میٹا کے چشموں میں فریم کے کونے پر ایک روشنی ہوتی ہے جو اس وقت جلتی ہے جب بلٹ اِن کیمرہ تصاویر یا ویڈیوز ریکارڈ کر رہا ہوتا ہے۔

کمپنی نے ٹیکنالوجی کے غلط استعمال کے خلاف خبردار کیا ہے۔ اس نے صارفین کو مشورہ دیا ہے کہ جب ریکارڈنگ لائٹ آن ہو تو دوسروں کو دکھائیں اور نجی جگہوں میں ریکارڈنگ سے گریز کریں۔

چشموں کے غلط استعمال کے خدشات

ستمبر میں میٹا نے چشموں کے برانڈز رے بین اور آکلے کے ساتھ شراکت داری میں اے آئی سے چلنے والے آلات کی ایک رینج متعارف کرائی۔

بی بی سی نیوز نے چشمہ بنانے والی کمپنی کے پیرنٹ ادارے ایسیلور لُکسوٹیکا سے تبصرے کے لیے رابطہ کیا ہے۔

اے آئی میں تیز رفتار ترقی کے نتیجے میں ایسے پہننے کے قابل آلات کی تعداد میں اضافہ ہوا ہے جو ڈیوائس کے ذریعے ریکارڈ کی گئی تصاویر اور آوازوں کی تشریح کے لیے اے آئی استعمال کرتے ہیں۔

ان فیچرز میں متن کا ترجمہ کرنا یا اس چیز کے بارے میں سوالات کے جواب دینا شامل ہو سکتا ہے جسے صارف دیکھ رہا ہے، یہ خصوصیت خاص طور پر نابینا یا جزوی طور پر کمزور نظر والے افراد کے لیے مفید ہے۔

تاہم، جیسے جیسے یہ آلات مقبول ہوئے ہیں، ان کے غلط استعمال کے خدشات بھی بڑھ گئے ہیں۔

خواتین نے پہلے بی بی سی کو بتایا ہے کہ انھیں سمارٹ چشمے استعمال کرنے والے افراد نے ان کی رضامندی کے بغیر فلمایا۔

ڈیٹا اینوٹیشن کرنے والی کمپنی ساما نے ایک غیر منافع بخش تنظیم کے طور پر آغاز کیا تھا، جس کا مقصد ٹیکنالوجی کی نوکریاں فراہم کر کے روزگار میں اضافہ کرنا تھا۔

یہ ایک کمپنی کے طور پر درج ہے لیکن ٹیک کمپنیوں کو مواد کی نگرانی کی خدمات فراہم کرنے والے ایک سابقہ معاہدے پر تنقید ہوئی تھی۔ ساتھ ہی ساتھ سابق ملازمین کی طرف سے قانونی کارروائی بھی کی گئی تھی۔

اس کے بعد اس نے مواد کی نگرانی کی خدمات بند کر دیں اور کہا کہ اسے اس طرح کا کام لینے پر افسوس ہے۔