پاکستان کی قومی اسمبلی میں حکومتی اور اپوزیشن ارکان کے درمیان ہاتھا پائی، اسد قیصر کا تحقیقات کا اعلان
،تصویر کا ذریعہSocial Media
پی ٹی آئی سے تعلق رکھنے والے سپیکر قومی اسمبلی اسد قیصر نے بدھ کو قومی اسمبلی میں پیش آنے والے واقعات کو مایوس کُن قرار دیتے ہوئے کہا ہے کہ اس کی مکمل تحقیقات کروائی جائیں گی۔
انھوں نے کہا ہے کہ غیر پارلیمانی زبان استعمال کرنے والے ارکان کو بدھ کو ایوان میں داخلے کی اجازت نہیں دی جائے گی۔
پاکستان کی قومی اسمبلی میں منگل کو ہونے والا اجلاس ہنگامہ آرائی کی نذر ہو گیا جس میں اپوزیشن اور حکومتی ارکان باہم دست و گریباں نظر آئے۔
یاد رہے کہ پیر کو بھی اجلاس کے دوران شور شرابہ دیکھنے میں آیا تھا لیکن منگل کو ایوان میں ہونے والی ہنگامہ آرائی کے بعد قومی اسمبلی کا اجلاس بدھ تک کے لیے ملتوی کر دیا گیا۔
پی ٹی آئی سے تعلق رکھنے والے سپیکر قومی اسمبلی اسد قیصر نے اپنی ایک ٹویٹ میں اسمبلی میں ہونے والے واقعات کو مایوس کُن قرار دیا۔ اُنھوں نے کہا کہ واقعے کی مکمل تحقیقات کروائی جائیں گی اور غیر پارلیمانی زبان استعمال کرنے والے ارکان کو بدھ کو ایوان میں داخلے کی اجازت نہیں دی جائے گی۔
واضح رہے کہ یہ قومی اسمبلی کا بجٹ اجلاس ہے جس میں حکومت کی جانب سے قومی بجٹ پیش کیا جا چکا ہے اور اب اس پر بحث جاری ہے۔ حکمراں جماعت کی جانب سے بجٹ پیش کیے جانے کے موقع پر بھی اسمبلی میں ہنگامہ آرائی ہوئی تھی۔۔
،تصویر کا ذریعہTwitter/@AsadQaiserPTI
اسمبلی میں کیا ہوا
قومی اسمبلی میں اپوزیشن لیڈر شہباز شریف نے تقریر شروع کی تو حکومتی ارکان نے نعرے بازی شروع کر دی اور جلد ہی صورتحال ہاتھا پائی تک پہنچ گئی۔ شہباز شریف نے اپنے خطاب میں حکومتی پالیسیوں کو تنقید کا نشانہ بنایا اور اپنے دور میں کیے گئے اقدامات گنواتے رہے۔
End of سب سے زیادہ پڑھی جانے والی
حکومتی ارکان کی جانب سے مسلسل شور شرابہ کیا جاتا رہا جس کے بعد اپوزیشن کے ارکان نے شہباز شریف کے گرد گھیرا بنا لیا۔
مسلم لیگ (ن) اور پاکستان تحریکِ انصاف کے ممبر اسمبلی ایک دوسرے پر بجٹ کی بھاری بھرکم کاپیاں پھینکتے ہوئے بھی دکھائی دیے اور پی ٹی آئی کے علی نواز اعوان اور مسلم لیگ (ن) کے شیخ روحیل اصغر کے درمیان سخت الفاظ کا تبادلہ بھی ہوا۔
علی نواز اعوان کی ایک ویڈیو بھی وائرل ہوئی جس میں وہ نازیبا الفاظ کا استعمال کرتے ہوئے نظر آئے۔
یہاں تک کہ قومی اسمبلی میں امن و امان قائم رکھنے کے لیے ذمہ دار اہلکار سارجنٹ ایٹ آرمز بھی اس ہاتھا پائی کو روکنے کی کوشش میں زخمی ہوئے۔
سیاسی رہنماؤں کے الزامات
اس معاملے پر سیاسی رہنماؤں کی جانب سے متفقہ طور پر یہی ردِعمل سامنے آیا ہے کہ منگل کو اسمبلی میں جو کچھ ہوا، وہ ٹھیک نہیں تھا، لیکن اس کے باوجود دونوں فریق ایک دوسرے کو اس کا ذمہ دار ٹھہرا رہے ہیں۔
منگل کی شام وزیرِ اطلاعات فواد چوہدری نے پاکستان کے نجی ٹی وی چینل جیو نیوز سے بات کرتے ہوئے کہا کہ ’اپوزیشن کے رویے نے پارلیمان کو اکھاڑا بنا کر رکھ دیا ہے‘۔
اُنھوں نے کہا کہ اپوزیشن چاہتی ہے کہ صرف اُن کی تقریریں سنی جائیں۔ اُنھوں نے کہا کہ اُنھوں نے اپوزیشن کو تجویز دی تھی کہ وہ وزیرِ اعظم اور حکومتی ارکان کو تقریر کرنے دیں اور حکومتی ارکان اُن کی تقریر سنیں، لیکن اُن کے مطابق ایسا نہیں ہوا۔
اُنھوں نے کہا کہ پی ٹی آئی رہنما علی نواز اعوان نے جو زبان استعمال کی وہ ردعمل میں کی گئی اور اس تاثر کو رد کیا کہ اس کا آغاز اُن کی طرف سے ہوا تھا۔
فواد چوہدری نے مزید کہا کہ ایوان چلانا دونوں فریقین کی ذمہ داری ہے اور اگر وہ ایوان نہیں چلانا چاہتے تو یہ ان کا اپنا نقصان ہے۔
یہ بھی پڑھیے
اسی ٹی وی پروگرام میں پاکستان مسلم لیگ (ن) کے سیکریٹری جنرل احسن اقبال نے کہا کہ اپوزیشن حکومت کے ساتھ تعاون کر رہی ہے۔ اُنھوں نے کہا کہ جب ماضی میں مفتاح اسماعیل بجٹ پیش کر رہے تھے تو پی ٹی آئی کی رکنِ اسمبلی شیریں مزاری نے اُن کے مائیک کے بالکل قریب آ کر نعرے بازی کی تھی۔
اُنھوں نے الزام عائد کرتے ہوئے کہا کہ حکومتی ارکان کی جانب سے یہ ہنگامہ آرائی وزیرِ اعظم عمران خان کے حکم پر ہو رہی ہے۔
احسن اقبال نے دعویٰ کیا کہ وزیرِ اعظم عمران خان نہیں چاہتے کہ شہباز شریف کی جانب سے ’بجٹ کی سچائی‘ عوام تک پہنچے۔
اُنھوں نے فواد چوہدری کے اس مؤقف کو بھی رد کیا کہ اپوزیشن یہ ہنگامہ آرائی پاکستان مسلم لیگ (ن) کی سینیئر نائب صدر مریم نواز شریف کی شہہ پر کر رہی ہے۔
فواد چوہدری نے ایک ٹویٹ میں ن لیگ کے اراکین اسمبلی پر تنقید کرتے ہوئے بتایا کہ خاتون رکن اسمبلی ملیکہ بخاری کی آنکھ پر بجٹ کی کاپی لگنے سے ان کی آنکھ زخمی ہوگئی ہے۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 1
مسلم لیگ (ن) کی سینیئر نائب صدر مریم نواز شریف نے دعویٰ کیا کہ حکومتی ارکان کی جانب سے شور شرابہ اور ایوان کی کارروائی میں خلل ڈالنا 'ذہنی طور پر اُن کی شکست کا اعتراف ہے۔'
،تصویر کا ذریعہTwitter/@MaryamNSharif
سوشل میڈیا ردعمل
صحافی و اینکر پرسن انیقہ نثار نے لکھا کہ ’قومی اسمبلی آج قوم کے لیے باعثِ شرم بن گئی ہے جہاں ارکانِ پارلیمنٹ نے بجٹ کو پڑھنے اور اس پر منطقی بحث کرنے کے بجائے اس کی کاپیوں کو بطور ہتھیار استعمال کیا۔‘
،تصویر کا ذریعہTwitter/@Aniqanisar
فیضان اعظم نامی صارف نے ہنگامہ آرائی کی ویڈیو کے ساتھ سوال کیا کہ ’کیا وہ پاکستان کی نئی اور آنے واکی نسل کے لیے یہ مثال قائم کرنا چاہتے ہیں؟
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 2
ایک صارف محمد عثمان نے لکھا کہ ’جو لوگ آج ارکانِ پارلیمنٹ کی جانب سے ہونے والی ہنگامہ آرائی پر لعن طعن اور شرمندگی کا اظہار کر رہے ہیں، ان سے سوال ہے کہ ان 'تماشہ بینوں' کو یہاں تک پہنچایا کس نے۔ اگر اس کے ذمہ دار عوام نہیں تو پھر کون ہے؟‘
،تصویر کا ذریعہTwitter/@usmanyaseenbaga
خدیجہ رضوی نے لکھا کہ ’آج قومی اسمبلی میں ہونے والی ہنگامہ آرائی سے یہ ثابت ہو گیا ہے کہ قومی اسمبلی میں فیصلے اپنے مفادات کے لیے ہوتے ہیں، عوام کے فائدے کے لیے نہیں۔‘
،تصویر کا ذریعہTwitter/@K_DJ_1
