موٹروے ریپ کیس: مرکزی ملزم گرفتار، پنجاب حکومت کی تصدیق

پاکستان کے صوبہ پنجاب کے حکام نے اعلان کیا ہے کہ گذشتہ ماہ لاہور کے قریب موٹروے پر پیش آنے والے ریپ کے مبینہ واقعے کے مرکزی ملزم کو گرفتار کر لیا گیا ہے۔

یاد رہے کہ نو ستمبر کو منگل اور بدھ کی درمیانی شب پیش آنے والے ایک واقعے کے دوران دو افراد نے مبینہ طور پر مدد کے انتظار میں سڑک کنارے کھڑی گاڑی میں سوار خاتون کو پکڑ کر قریبی کھیتوں میں اُن کے بچوں کے سامنے ریپ کیا تھا۔

اس سے پہلے پولیس نے ایک ملزم کو گرفتار کر لیا تھا جو اس وقت جوڈیشل ریمانڈ پر جیل میں ہے، تاہم دوسرا ملزم متعدد چھاپوں کے باوجود پولیس کی پہنچ سے نکلنے میں کامیاب رہا تھا۔

تاہم آج پنجاب پولیس نے ملزم کو گرفتار کر لیا ہے۔

یہ بھی پڑھیے

موٹروے ریپ کیس کا ایک ملزم پولیس کی تحویل میں، تفتیش جاری

موٹروے ریپ کیس: ’پنجاب حکومت کا واحد فوکس ملزمان تک جلد از جلد پہنچنا ہے‘

موٹروے واقعہ اور میڈیا پر ’شناخت پریڈ‘: ’متاثرہ خاتون کی اصل آزمائش تو اب شروع ہو گی‘

صوبہ پنجاب کے وزیرِ اطلاعات فیاض الحسن چوہان نے اس گرفتاری کی تصدیق کر دی ہے۔

مقامی ٹی وی چینل جیو نیوز سے گفتگو کرتے ہوئے فیاض چوہان نے مزید کہا کہ حکام کی یہ حکمتِ عملی تھی کہ ملزم ’ریلیکس‘ محسوس کرے تاکہ اسے گرفتار کرنے میں آسانی ہو جائے، اور جیسے ہی یہ ہوا، اسے گرفتار کر لیا گیا۔

موٹروے ریپ کیس کا پس منظر

لاہور کے تھانہ گجرپورہ میں درج کروائی گئی ایف آئی آر میں کہا گیا تھا کہ گوجرانوالہ کے رہائشی درخواست دہندہ کی رشتے دار خاتون کی گاڑی کا جنگل کے قریب پیٹرول ختم ہو گیا تھا اور وہ مدد کے انتظار میں کھڑی تھیں۔

ایف آئی آر کے مطابق درخواست دہندہ کی عزیزہ نے بتایا کہ جب وہ پیٹرول کے انتظار میں کھڑی تھیں تو 30 سے 35 سال کی عمر کے دو مسلح اشخاص آئے، انھیں اور ان کے بچوں کو گاڑی سے نکال کر ان کا ریپ کیا اور ان سے نقدی اور زیور چھین کر فرار ہو گئے۔

ایف آئی آر کے مطابق خاتون سے ریپ کا واقعہ رات تین بجے کے قریب پیش آیا اور متاثرہ خاتون کے رشتے دار نے بدھ کی صبح 10 بجے پولیس اسٹیشن گجر پورہ میں مقدمہ درج کروایا۔

مدعی نے پولیس کو بتایا کہ جب وہ اس جگہ پہنچے جہاں پر پیٹرول ختم ہونے کی وجہ سے روک گئی تو انھوں نے دیکھا کہ گاڑی کا شیشہ ٹوٹا ہوا تھا اور اس پر خون کے دھبے تھے، جس کے بعد انھوں نے رشتے دار خاتون کو کرول کے جنگل کی جانب سے بچوں کے ساتھ آتے دیکھا۔

موٹروے پولیس نے کہا تھا کہ جس جگہ خاتون کو ریپ کا نشانہ بنایا گیا وہ موٹروے پولیس کی حدود میں شامل نہیں ہے۔ ترجمان کے بقول رنگ روڈ موٹروے پولیس کی حدود میں نہیں ہے۔

سی سی پی او لاہور عمر شیخ نے موٹروے پر پیش آنے والے ریپ کے واقعے کے بعد متعدد ٹی وی چینلز پر انٹرویو دیتے ہوئے کہا تھا کہ: 'تین بچوں کی ماں اکیلی رات گئے اپنے گھر سے اپنی گاڑی میں نکلے تو اسے سیدھا راستہ لینا چاہیے ناں؟ اور یہ بھی چیک کرنا چاہیے کہ گاڑی میں پیٹرول پورا ہے بھی یا نہیں۔۔۔'

اس کے بعد سی سی پی او لاہور کو شدید تنقید کا نشانہ بنایا گیا، جس کے بعد انھوں نے معافی مانگ لی تھی تاہم ان کے بیان کا معاملہ پاکستانی سینیٹ کی قائمہ کمیٹی برائے انسانی حقوق تک بھی جا پہنچا جہاں انھیں قانون سازوں کی برہمی کا سامنا کرنا پڑا۔

ملزم کی گرفتاریوں کی کوشش اور پہلی گرفتاری

پیر 14 ستمبر کی شام سماجی رابطے کی سائٹ ٹوئٹر پر تفصیل بتاتے ہوئے وزیراعلیٰ پنجاب نے کہا تھا 'سیالکوٹ موٹروے کے دلخراش واقعہ میں خاتون سے زیادتی میں ملوث شخص گرفتار ہو چکا ہے۔'

ان کے بقول گرفتار شخص کا 'ڈی این اے بھی میچ کر چکا ہے اور اس نے اعتراف جرم بھی کر لیا ہے۔'

عثمان بزدار کا یہ بھی کہنا تھا کہ مقدمے میں مطلوب دوسرے ملزم کی گرفتاری کے لیے بھی 'ہماری ساری ٹیم مسلسل کوشاں ہے جس کی گرفتاری انشا اللہ جلد متوقع ہے۔'

پنجاب پولیس کے سربراہ انعام غنی نے بھی ٹوئٹر پر ایک پیغام میں بتایا کہ گرفتار کیے جانے والے ملزم کا تعلق بہاولنگر سے ہے۔

خیال رہے کہ اس سے قبل سنیچر 12 ستمبر کو وزیراعلیٰ عثمان بزدار کی سربراہی میں اعلیٰ حکام کی پریس کانفرنس میں جن دو ملزمان کی تفصیلات اور تصاویر جاری کی گئی تھیں، گرفتار ملزم ان میں شامل نہیں تھا۔

حکام نے جن دو افراد کی تصاویر اور معلومات جاری کی تھیں ان میں سے ایک نے اتوار 13 ستمبر کی صبح لاہور میں خود کو حکام کے حوالے کر دیا تھا اور خود پر عائد تمام الزامات کی تردید کی تھی۔

اس حوالے سے مزید پڑھیے

موٹروے ریپ کیس کا مرکزی ملزم ہر موڑ پر پولیس سے آگے کیسے

’ہمارے کپڑے نہیں تو ہمارا رویہ، وہ بھی نہیں تو وہ راستہ جو ہم نے لیا۔۔۔‘

پاکستان میں ریپ جیسے جرائم کے لیے کیا مزید قانون سازی کی ضرورت ہے؟

اُس ملزم کا کہنا تھا کہ اس کے جس موبائل نمبر کی بنیاد پر اسے واقعے میں ملوث قرار دیا گیا وہ اس کے زیرِ استعمال نہیں بلکہ اسے اس کے برادرِ نسبتی استعمال کرتے ہیں۔ پیر 14 ستمبر کی صبح مذکورہ برادرِ نسبتی نے بھی شیخوپورہ میں پولیس کو گرفتاری دے دی تھی اور واقعے سے کسی قسم کا تعلق نہ ہونے کا دعویٰ کیا تھا۔

اس کے بعد لاہور کی انسداد دہشت گردی عدالت نے سیالکوٹ موٹر وے پر دوران ڈکیتی خاتون سے زیادتی کے ملزم کا 14 روزہ جوڈیشل ریمانڈ دیتے ہوئے انھیں جیل منتقل کرنے کا حکم دیا تھا۔

عدالت نے استغاثہ کی جانب سے ملزم کی شناخت پریڈ کروانے کی استدعا بھی منظور کر لی تھی۔

یہ ایک ابتدائی خبر ہے اور اسے مزید معلومات موصول ہونے پر اپ ڈیٹ کیا جائے گا۔