ملک کا اگلا وزیراعظم بنوں گا: بلاول بھٹو زرداری

پاکستان پیپلزپارٹی کے چیئرمین بلاول بھٹو زرداری نے کہا ہے کہ آئندہ انتخابات میں کامیابی حاصل کر کے، وہ ملک کے اگلے وزیراعظم بننے والے ہیں۔

لاہور میں پاکستان پیپلزپارٹی کے 49ویں یوم تاسیس کے حوالے بلاول ہاؤس میں ہونے والی ایک تقریب میں خطاب کرتے ہوئے بلاول بھٹو زرداری کا کہنا تھا کہ آنے والے عام انتخابات میں پیپلزپارٹی تمام صوبوں میں شاندار کامیابی کا ریکارڈ بنانے جا رہی ہے۔

بلاول بھٹو زرداری نے کہا کہ ملک اس وقت ایک نازک مرحلے سے گزر رہا ہے، اسی لیے ہمیں ایک لائق وزیر داخلہ کی ضرورت ہے جو کہ پارلیمنٹ کے سامنے جوبدہ ہوں۔

انھوں نے کہا کہ اگر چودھری نثار کو نہیں ہٹایا گیا اور ہمارے مطالبات نہیں مانے گئے تو ’گو نواز گو‘ کا نعرہ پورے پاکستان میں گونجے گا۔

یاد رہے کہ بلاول بھٹو زرداری اس سے پہلے بھی نواز حکومت سے کہہ چکے ہیں کہ اگر ان کے مطالبات منظور نہ ہوئے تو وہ لانگ مارچ کریں گے۔

ان کے چار مطالبات یہ ہیں:

جمعے کے روز ہونے والی اس تقریب میں پاکستان پیپلزپارٹی کے چیئرمین نے اعلان کیا کہ وہ اپنے آبائی حلقہ سے انتخاب لڑیں گے لیکن اس کے وقت کا فیصلہ پارٹی کرے گی۔

انھوں نے وزیراعظم نواز شریف کو تنقید کا نشانہ بناتے ہوئے کہا کہ اگر نواز شریف تین مرتبہ وزیراعظم بن کر بھی اس عہدے کی ذمہ داریاں نبھانے کے لیے تیار نہیں تو یہ کام میں کر لوں گا۔

اس موقع پر مرکزی رہنما سینیٹر شیری رحمان نے کہا کہ ہماری پارٹی نے ہمیشہ جمہوریت اور اس کے استحکام کے لیے قربانیاں دی ہیں اور یہ جدوجہد بلاروک جاری رہے گی۔