 |  معاملے کو اقوام متحدہ لے جانے کا کوئی جواز نہیں |
ایران نے کہا ہے کہ اگر یورپ اس کے جوہری منصوبے کا معاملہ سلامتی کونسل میں لے کر گیا اس کے ’نتائج‘ بھی ہوں گے۔ ایران کے نئے وزیر خارجہ منوچہر متقی نے یہ واضح نہیں کیا کہ یہ ’نتائج‘ کیا ہوں گے۔ منوچہر متقی نے کہا کہ ایران کے جوہری منصوبے کے بارے میں سلامتی کونسل جانے کا کوئی قانونی جواز نہیں ہے۔ انہوں نے کہا ایران نے اپنے جوہری پروگرام کے بارے میں کبھی کوئی بات نہیں چھپائی۔ یورپی یونین نے کہا ہے کہ اگر ایران نے اپنے جوہری منصوبے کے بارے میں ایک ماہ سے تعطل کا شکار مذاکرات دوبارہ شروع نہیں کیے تو وہ اقوام متحدہ کی سلامتی کونسل سے رجوع کرے گی۔ ایران کے وزیر خارجہ نے کہا کہ ان کا ملک مذاکرات جاری رکھنا چاہتا ہے لیکن بی بی سی کے تہران میں نامہ نگار کا کہنا ہے کہ یورپی یونین کے ساتھ مذاکرات دوبارہ شروع ہونے کا امکان نہیں ہے۔ تہران امریکہ کے ان الزامات کی تردید کرتا ہے کہ اس کا جوہری ہتھیار بنانے کا ارادہ ہے۔ جوہری توانائی کے بین الاقوامی ادارے آئی اے ای اے نے ایران کے جوہری پروگرام پر بات کرنے کے لیے انیس ستمبر کو اجلاس بلایا ہے۔ | 
یہ صفحہ دوست کو ای میل کیجیئے
پرِنٹ کریں
