’رپورٹ نے ایران کے جوہری پروگرام کے بارے میں ہماری تشویش کم نہیں کی‘

تحقیقاتی ٹیم نے دو سال قبل ایران سے ملنے والے یورینیم کے ذرات کا تجزیہ کیا تھا اور کہا تھا کہ یہ پاکستان سے حاصل ہونے والے آلات سے اترے تھے۔

دو سال قبل ایران سے یورینیم ملنے پر بُش انتظامیہ نے غصے کا اظہار کیا تھا اور امریکہ نے ایران پر خفیہ طور پر جوہری ہتھیار بنانے کا الزام لگایا تھا۔ لیکن امریکی سائنسدانوں اور حکومتی ارکان پر مشتمل ایک ٹیم نے تحقیق سے معلوم کیا ہے کہ اس یورینیم کے بارے میں ایران کا موقف درست تھا کہ یہ پاکستان سے منگوائے جانے والے آلات کے ساتھ آیا تھا۔

تحقیقاتی ٹیم کے فیصلہ کے باوجود امریکی انتظامیہ کا ایران کے جوہری پروگرام کے بارے میں شک دور نہیں ہوا۔

امریکی وزارت خارجہ کے ایک ترجمان کا کہنا کہ ’اس رپورٹ نے ایران کے جوہری پروگرام کے بارے میں ان کی تشویش کم نہیں کی‘۔ انہوں نے مختلف معاملات کی ایک فہرست پیش کی جو ابھی تک حل طلب ہیں۔ ان معاملات میں بُش انتظامیہ کا پرانا دعویٰ شامل ہے کہ ایران خفیہ طور پر جوہری ہتھیار حاصل اور تیار کر رہا ہے۔ اس کے علاوہ ایران کے جوہری ہتھیاروں سے وابستہ زیر زمین تنظیموں سے رابطے کا معاملہ بھی ہے۔