 |  خوراک اور رقم کی بجائے تکنیکی امداد چاہیے: تھائی حکام |
امریکی وزیر خارجہ کولن پاول نے کہا ہے کہ امریکہ تھائی لینڈ کو تعمیر نو اور لاشوں کی شناخت میں مدد دے گا۔ کولن پاول نے یہ بات سونامی سے متاثرہ ممالک کے دورے کے آغاز پر تھائی لینڈ میں کہی۔ انہوں نے کہا کہ ’امریکہ ان لوگوں سے منہ نہیں موڑے گا جنہیں مدد کی فوری ضرورت ہے‘۔ نامہ نگاروں کا کہنا ہے کہ سونامی سے تباہی پھیلنے کے فوراً بعد امریکہ کے رد عمل پر تنقید کے بعد اب وہ تاثر دے رہا ہے کہ وہ امدادی کام میں پوری طرح شریک ہے۔ کولن پاول نے امریکہ کی طرف سے ساڑھے تین ارب ڈالر کی امداد کے وعدے کو مد نظر رکھتے ہوئے کہا کہ ’سونامی کے اثرات عالمی المیہ ہے۔۔۔۔اور میرے خیال میں ہم نے حالیہ دنوں میں مدد فراہم کرنے کی نیت کا مظاہرہ کیا ہے‘۔ کولن پاول نے تھائی لینڈ کے متاثرہ علاقے پھوکٹ کا دورہ کرنے سے پہلے تھائی حکام سے بات چیت کی اور جاننے کی کوشش کی کہ اس موقع پر امریکہ کس طرح اپنا کردار ادا کر سکتا ہے۔ تھائی حکام کہہ چکے ہیں کہ انہیں خوراک اور پیسے کی بجائے تکنیکی امداد کی ضرورت ہے۔ بی بی سی کی نامہ نگار کے مطابق امریکی وزیر خارجہ تباہی دیکھ کر کسی حد تک حیرت زدہ نظر آ رہے تھے۔ امریکی وزیر خارجہ جکارتہ میں سونامی کے بعد کی صورتحال کے بارے میں ایک سیمینار میں شرکت سے قبل انڈونیشیا کے تباہ حال جزیرے آچے کا دورہ کریں گے۔ | 
یہ صفحہ دوست کو ای میل کیجیئے
پرِنٹ کریں
