خالد مشال دمشق میں حماس کے صدر دفتر سے تنظیم کی رہنمائی کرتے ہیں

بی بی سی کے ساتھ ایک انٹرویو میں حماس کے رہنما خالد مشال نے کہا ہے کہ یورپی یونین ہمارے ساتھ رابطے میں ہے۔

انہوں نے یہ دعوٰی بھی کیا کہ حالیہ چند ماہ کے دوران امریکہ نے بھی حماس سے رابطہ قائم کیا ہے۔

یورپی یونین اور امریکہ دونوں ہی حماس کو ایک ’دہشتگرد تنظیم‘ قرار دیتے ہیں۔ جس کا مطلب یہ ہوا کہ امریکی ایجنسیوں کی کوشش ہے کہ اس تنظیم کے فنڈز کے ذرائع ختم کرکے اس کے رہنماؤں کو تنہا کردیا جائے۔

یورپی یونین حماس کو ایک طاقت تسلیم کرتی ہے اور اس کا موقف ہے کہ مشرق وسطٰی کے مسئلے کا کوئی بھی حل حماس کی شرکت کے بغیر ممکن نہیں ہے۔

دوسری جانب یورپی یونین کی ترجمان کا کہنا ہے کہ وہ ایسے کسی رابطے سے آگاہ نہیں ہیں۔ تاہم امریکہ کی جانب سے خالد مشال کے بیان پر کوئی فوری ردعمل سامنے نہیں آیا ہے۔

یورپی یونین کی خارجہ پالیسی کے سربراہ حاویار سولانا نے گزشتہ ماہ کہا تھا کہ انہوں نے حماس سے براہ راست رابطہ کیا ہے تاہم بعد میں انہوں نے اس کی تردید کردی۔

خالد مشال کا کہنا ہے کہ وہ 9 جنوری کو منعقد کیے جانے والے فلسطینی صدارتی انتخابات کا بائی کاٹ کررہے ہیں۔ ان کا کہنا ہے کہ یہ انتخابات پرانے نظریات کی بنیاد پر ہی ہو رہے ہیں جس کا مطلب ہوا کہ اس سے حالات پر کوئی فرق نہیں پڑے گا۔

ان کی شکایت ہے کہ فتح تنظیم انتخابات کو اپنے حق میں کرنے کے لیے احتیارات کا ناجائز استعمال کررہی ہے۔