صدر بُش امریکہ کو طاقتور اور محفوظ بنائیں گے: مکین

نیو یارک میں رپبلکن پارٹی کے کنونشن سے خطاب کرتے ہوئے جان مکین نے کہا کہ صدر بش مُشکل فیصلوں سے نہیں گھبراتے۔

انہوں نے کہا کہ دہشت گردی کے خلاف جنگ ناگزیر ہے اور اس کو منطقی انجام تک پہنچا کر ہی دم لیا جا سکتا ہے۔

رپبلکن پارٹی ان ووٹروں کی حمایت حاصل کرنے کی کوشش میں ہے جنہوں نے ابھی تک فیصلہ نہیں کیا کہ وہ کس جماعت کو ووٹ دیں گے۔

انتخابات کے بارے میں تجزیوں کے مطابق مقابلہ بہت سخت ہوگا۔

مبصرین کے مطابق جان مکین کو ایک آزاد رائے رکھنے والا سیاستدان سمجھا جاتا ہے جو اپنی جماعت سے اختلاف کرنے سے نہیں گھبراتے۔

رپبلکن کنونشن سخت حفاظتی انتظامات میں اس جگہ کے بہت قریب ہو رہا ہے جہاں پر گیارہ ستمبر کے حملوں میں تباہ ہونے والا ورلڈ ٹریڈ سنٹر ہوا کرتا تھا۔

جان مکین نے اپنی تقریر میں کہا کہ صرف انتہائی غلط فہمی کا شکار امریکی ہی دہشت گردی کے خلاف جنگ کی ضرورت سے انکار کر سکتے ہیں۔

جان مکین نے امریکی فِلم ہدایت کار مائیکل مُور کو بھی تنقید کا نشانہ بنایا جن کی فلم فارن ہائیٹ نائن الیون میں صدر بُش کی مخالفت کی گئی ہے۔

انہوں نے کہا کہ مائیکل مور لوگوں کو یہ بتانا چاہتے ہیں کہ عراق امن کا گہوارہ تھا۔ حاضرین نے ان کی بات پر شور مچا کر مائیکل مور کی مخالفت کا اظہار کیا۔ مائیکل مور اس موقعہ پر کنونشن میں موجود تھے۔

نامہ نگاروں کا کہنا ہے کہ جان مکین کا ویت نام جنگ میں عمدہ ریکارڈ کو ڈیموکریٹک پارٹی کے امیدوار جان کیری کی اس جنگ میں کارکردگی کا جواب دینے کے لیے استعمال کیا جا سکتا ہے۔