نجف میں جاری لڑائی پانچ اگست کو شروع ہوئی تھی

مقتدی الصدر نے وفد سے ملاقات نہیں کی۔ مقتدی الصدر کے ترجمان نے کہا ہے کہ وہ حفاظتی اقدامات کی وجہ سے وفد سے نہیں مل سکتے۔ البتہ ان کے ایک معاون نے کہا کہ مقتدی الصدر وفد کی تشکیل سے ناخوش تھے کیونکہ ان کے خیال وفد کی حثیت ایک پیغام رساں سے زیادہ نہیں ہے۔

نجف میں مزاحمت کاروں کی قیادت کرنے والے شیعہ رہنما مقتدیٰ الصدر کے ایک رشتہ دار بھی وفد کی قیادت کر رہے تھے۔

عراق میں جاری قومی کانفرنس ایک دن کے لیے بڑھا دی گئی ہے ۔ قومی کانفرنس ایک سو افراد پر مشتمل قومی اسمبلی کا انتخاب کرئے گی جو اگلے سال ہونے والے انتخابات کی نگرانی کرئے گی۔

منگل کے روز شہرمیں حضرت علی کے روضے کے قریب شدید لڑائی ہوئی جہاں مقتدیٰ الصدر اور ان کے حامیوں کو امریکی فوج نے گھیرے میں لے رکھا ہے۔

کم سے کم ایک امریکی جہاز نے نجف کے اس بڑے قبرستان پر بم گرائے جہاں سے مزاحمت کاروں نے مشین گنوں اور دیگر اسلحے سے جوابی فائرنگ کی۔

منگل کے روز عراق میں ایک مارٹر حملے میں سات افراد ہلاک ہو گئے۔ یہ حملہ شہر کےمصروف علاقے میں الرشید سٹریٹ میں ہوا۔

نجف میں جاری لڑائی پانچ اگست کو شروع ہوئی تھی جس کے بعد شہر میں جون کو ہونے والی جنگ بندی ختم ہو گئی۔