 |  مزاحمت کار نے امریکی حملے کے عزم کا اظہار کیا ہے |
عراق کے شہر نجف میں کشیدگی جاری ہے اور مزاحمت کاروں کا کہنا ہے کہ اگر امریکی فوج مقدس شہر میں داخل ہوئی تو مقابلہ کیا جائے گا۔ مقتدٰی الصدر کے ایک ترجمان شیخ محمود السوڈانی نے کہا ہے کہ جیش مہدی نجف شہر کے دفاع کے لیے پوری طرح تیار ہے اور اگر امریکی شہر میں داخل ہوئی تو اس کا بھرپور مقابلہ کیا جائے گا اس سے قبل امریکی فوج کے ترجمان نے کہا ہے کہ امریکی اور عراقی فوج نے مشترکہ تربیتی مشقیں شروع کی ہیں اور نجف پرایک بڑے حملے کی تیاری کی جا رہی ہے تاکہ نجف میں جاری لڑائی کو ختم کیا جا سکے۔ عراق میں امریکی فوج اور شیعہ مزاحمت کاروں کے درمیان ہفتہ بھر سے جاری لڑائی نجف سے باہر تک پھیل گئی ہے۔ عراق کے ایک نائب صدر ابراہیم جعفری نے امریکی فوج سے مطالبہ کیا ہے کہ وہ نجف سے پیچھے ہٹ جائے اور عراقی فوج کو نجف میں کارروائی کرنے دے۔ لیکن امریکی فوج جس کو نجف کے گورنر نے بلایا تھا نے عراقی نائب صدر کی درخواست پر نجف سے پیچھے ہٹنے سے انکار کر دیا اور کہا کہ وہ پسپا ہونے کی بجائے پیش قدمی کی تیاری کر رہی ہے۔ امریکی فوج کے ایک کرنل انتھونی ہسلام نے کہا امریکی فوج نجف میں مقتدی الصدر کی جانب سے شروع کی جانے والی لڑائی کو ختم کرنے کے لیے تیاری کر رہی ہے۔ امریکی فوج کے ترجمان نے کہا نجف کے گورنر عدنان الزورفی نے امریکی فوج کو حضرت علی کے روضے میں داخل ہونے کی اجازت دی ہے کیونکہ مقتدی الصدر کی ملیشیا کے ارکان روضے میں پناہ لیے ہوئے ہیں۔ مقتدی الصدر نے اپنے ماننے والوں کو کہا ہے کہ اگر وہ مارے یا پکڑے جائیں تب بھی لڑائی جاری رکھی جائے۔ | 
یہ صفحہ دوست کو ای میل کیجیئے
پرِنٹ کریں
