امریکہ کو امید ہے کہ نئی عراقی حکومت کی تشکیل سے سفارتی میدان میں کام آسان ہو جائے گا

یہ منصوبہ امریکہ اور برطانیہ نے پیش کیا ہے جس میں ملک سے غیر ملکی فوجوں کے انخلا کا ٹائم ٹیبل دیا گیا ہے۔

تاہم کئی ممالک کا کہنا ہے کہ اس میں یہ تفصیل نہیں دی گئی کہ عراقی حکومت کو اقتدار کی مکمل منتقلی کے بعد ان غیرملکی افواج کا کیا کردار ہوگا۔

سیکورٹی کونسل کے ارکان نے بند کمرے میں ملاقات کی۔

سیکورٹی کونسل کے کئی ارکان نے اس قرارداد کے پہلے مسودے پر اعتراض کیا تھا کیونکہ اس میں عراقیوں کو فوجی معاملات میں اختیارات نہیں دئیے گئے تھے۔

واشنگٹن میں بی بی سی کے نامہ نگار کا کہنا ہے کہ امریکہ اور برطانیہ عراق کی نئی حکومت کو تسلیم کرانے کے لئے تیزی سے اقدامات کررہے ہیں ۔

نامہ نگار کے مطابق ان دونوں نے اقوام متحدہ میں ایک قرارداد پیش کردی ہے جس میں عراقی جنگ کے مخالفوں کے لئے کئی مراعات شامل ہیں ۔ مثلاً کہا گیا ہے کہ تیل پر عراقیوں کو مکلمل اختیار ہوگااور اس سے زیادہ اہم بات یہ ہے کہ بیرونی فوجیں اگلے سال الیکشن کے فوراً بعد واپس جانے لگیں گی۔

نامہ نگار کے مطابق واشنگٹن میں اس بات پر واقعی خوشی محسوس کی گئی ہے کہ اس کے منصوبے کا کم سے کم ایک حصہ پورا ہو گیا ہے۔

صدر بش نے کہا کہ عراق کی نئی حکومت میں صلاحیت ہے، عزم ہے، اور عہد کا پاس ہے۔

انہوں زور دیتے ہوۓ کہا کہ وائٹ ہاؤس نے نہیں بلکہ اقوام متحدہ نے ان نئے لیڈروں کو چنا ہے اور کوفی عنان کے اس بیان کے باوجود کہ اس عمل کو پوری طرح درست اور صحیح نہیں کہا جاسکتا، صدر بش بہت خوش نظر آرہے تھے۔

نامہ نگار کے مطابق منگل کے روز عراقی حکومت کے نئے صدر کا معاملہ بھی کئی دن کی بحث و تمحیص کے بعد طے کرلیا گیا اور امریکی نامزد انتظامی کونسل نے اس امیدوار کو مسترد کردیا جسے امریکہ کی حمایت حاصل تھی۔

اس طرح کونسل کے اپنے نامزد کردہ امیدوار کو چن لیا گیا۔ تیس جون کو جب امریکی حلیف اقتدار عراقیوں کو سونپیں گے تو غازی الیاور نئے صدر بن جائیں گے۔