جان کیری صدر بش کے لئے چیلنج

ریاست وسکونسن میں ڈالے گئے ووٹوں میں جان کیری نے چالیس اور جان اڈورڈز نے چوتیس فیصد ووٹ حاصل کئے اور یوں ساٹھ برس کے کیری ابتدائی سولہ انتخابی مراحل میں سے چودہ میں کامیاب ہو کر صدر بش کے اہم مدمقابل کی حیثیت سے سامنے آئے ہیں۔

جان اڈورڈز نے کہا ہے کہ انہیں ریاست وسکونسن میں اپنی حمایت کی شرح میں اضافہ پر حیرانگی ہوئی ہے۔

تاہم ریاست ورمنٹ کے سابق گورنر ہاورڈ ڈین ووٹوں کے اعتبار سے تیسرے نمبر پر آئے ہیں۔ انہوں نے کہا تھا کہ اگر انہیں وسکونسن میں شکست کا سامنا ہوا تو وہ ڈیموکریٹک پارٹی کی نمائندگی حاصل کرنے کی کوشش چھوڑ دیں گے۔

تاہم بعد میں انہوں نے اپنا ارادہ بدل دیا اور وسکونسن میں نتائج آنے کے بعد اپنے حامیوں سے بات چیت کرتے ہوئے کہا کہ ’ہم ابھی اپنی کوشش ترک نہیں کریں گے‘۔

ریاست وسکونسن کے دارالحکومت میڈیسن میں موجود بی بی سی کے ڈیوڈ ویلیس کا کہنا ہے کہ امریکہ کی صدارتی دوڑ میں ہاورڈ ڈین کے امکانات کم ہیں۔

تاہم ڈیوڈ ویلیس کا یہ بھی کہا کہ جان ہاورڈز کو ریاست وسکونسن میں اپنی کوششوں کا کسی حد تک فائدہ ضرور ہوا ہے۔