امریکی سینیٹر جان کیری کا تعلق شمالی ریاست میساچوسیٹس سے ہے۔

ان کی اس کامیابی سے آئندہ نومبر میں متوقع امریکہ کے صدارتی انتخاب میں انہیں حزب اختلاف کی جماعت ڈیموکریٹک پارٹی کی جانب سے امیدوار نامزد کیے جانے پر مہر ثبت ہوگئی ہے۔ وہ ری پبلکن جماعت کے صدر جارج بش کے خلاف امریکی صدارت کا انتخاب لڑیں گے۔

سینیٹر جان کیری کی اس زبردست کامیابی کے فوراً بعد ان کے ایک حریف ویسلے کلارک نے ڈیموکریٹک پارٹی کی جانب سے صدارتی امیدوار نامزد کیے جانے کی دوڑ سے علیحدگی کا اعلان کیا ہے۔

جان کیری نے دونوں ریاستوں میں باآسانی کامیابی حاصل کرلی ہے جو جنوبی امریکی ریاستوں میں ان کی پہلی کامیابی ہے۔

شمالی ریاست میساچوسیٹس سے تعلق رکھنے والے سینیٹر جان کیری نے اب تک چودہ ریاستوں میں ہونے واالے پرائمری انتخابات میں سے بارہ میں کامیابی حاصل کی ہے۔

کامیابی کے بعد ریاست ورجینیا میں اپنے حامیوں سے خطاب کرتے ہوئے انہوں نے کہا کہ امریکی عوام تبدیلی کے لیے رائے دے رہے ہیں۔

ورجینیا میں بی بی سی کے نامہ نگار کا کہنا ہے کہ جان کیری نے کسی بھی امیدوار کے لیے یہ مشکل بنا دیا ہے کہ وہ انہیں حزب اختلاف کی جماعت ڈیموکریٹک پارٹی کی جانب سے امیدوار نامزد کیے جانے سے روک سکیں۔