بارنبی میسن نامہ نگار برائے سفارتی امور

ڈیسمنڈ ٹوٹو: عراق میں جنگ کے سخت مخالف

ڈیسمنڈ ٹوٹو نے امریکی صدر جارج بش اور برطانوی وزیراعظم ٹونی بلئیر سے اپیل کی کہ وہ اس بات کا اعتراف کریں کہ ان سے ایک غلطی سرزد ہوئی ہے۔

ڈیسمنڈ ٹوٹو نے یہ مطالبہ بھی کیا کہ اس بات کا تعین کرنے کی بھی ضرورت ہے کہ آیا بین الاقوامی قوانین کی مخالفت میں جنگ کرنا صحیح تھا یا نہیں۔

ڈیسمنڈ ٹوٹو کی یہ کڑی نکتہ چینی لندن میں ایک ٹرسٹ کی تقریب میں دئیے جانے والے ایک لیکچر میں سامنے آئی۔ ڈیسمنڈ ٹوٹو نے لندن میں ایک یونیورسٹی میں مہمان پروفیسر کے طور پر فرائض سنبھالنے کے بعد سے عراق کی جنگ پر کئی بار شدید تنقید کی ہے۔ لیکن اس حالیہ لیکچر میں ان کی تنقید سب سے سخت تھی۔

انہوں نے کہا کہ فوجی ذہنیت کی جارحانہ پالیسی نے ایک نئے خیال کو جنم دیا ہے جس کے مطابق انٹیلی جینس کی بنیاد پر خطرے سے پہلے ہی حملہ کر دیا جائے۔

ڈیسمنڈ ٹوٹو نے عراق سے متعلق انٹیلی جینس کو ناقص قرار دیتے ہوئے جنگ کی حمایت میں پیش کی جانے والی دوسری توجیح کو بھی اپنی تنقید کا نشانہ بنایا جس میں یہ کہا جاتا ہے کہ عراق میں ایک جابر حکمران قابض تھا اس لئے اسے ہٹانے کے لئے جنگ ضروری تھی۔