جرمن فوجیوں کی نایاب تصاویر

دوسری جنگ عظیم کے دوران جرمنی کے فوجی کی جانب سے لی گئی تصاویر کی نمائش نیدرلینڈز میں کی جا رہی ہے۔ جرمن فوجی کا یہ کیمرہ برطانوی فوجی کو ملا تھا۔

رائل میرین کے آرتھر تھامسن کو یہ کیمرہ یکم نومبر 1944 کو نیدرلینڈز سے جرمن فوج کو نکالنے کے آپریشن کے دوران ملا تھا۔ یہ کیمرہ ایک بڑی بنکر میں جرمن فوج کے سامان کے ساتھ پڑا ملا تھا۔

اس کیمرے میں سے صرف جرمن فوجیوں کی آرام کرتے ہوئے کی تصاویر ہی نہیں ملیں بلکہ برطانوی کمانڈوز کی تصاویر بھی ملیں ہیں جو تھامسن نےکھینچی تھیں۔

آرتھر تھامسن کا انتقال89 سال کی عمر میں 2013 میں ہوا تھا اور ان کی خواہش تھی کہ کیمرہ اور تصاویر نیدرلینڈز کو دے دی جائیں جہاں سے ان کو یہ کیمرہ ملا تھا۔

جس بنکر سے تھامسن کو یہ کیمرہ ملا تھا وہ بنکر ہٹلر کے دفاعی نظام ’ایٹلانٹک وال‘ کا حصہ تھا۔ یہ دفاعی نظام اتحادیوں کے حملے کو روکنے کے لیے سپین سے سکینڈینیویا تک پھیلا ہوا تھا۔

تھامسن دوسری جنگ عظیم کے وقت 21 سال کے تھے اور وہ 47 رائل میرین کا حصہ تھے۔

انتقال سے قبل ان کا کہنا تھا ’ہم بنکر میں تلاشی لے رہے تھے اور میں نے یہ کیمرہ اٹھا لیا۔ اس میں فلم تھی۔ جرمن فوجیوں نے اتنی زیادہ تصاویر لی ہوئی تھیں اور چند ہی تصاویر بچی تھیں۔ تو میں نے بھی چند تصاویر کھینچیں۔‘

’میں جب جنگ سے واپس آیا تو تصاویر نکلوائیں اور ان میں جرمن فوجیوں کی تصاویر اور چند تصاویر ہو جو میں نے کھینچی تھیں۔‘

یاد رہے کہ 47 رائل میرین اگست 1943 میں قائم کی گئی تھی اور اس نے نارمنڈی لینڈنگ میں بھی حصہ لیا۔

تھامسن کی بیٹی کلیئر ہنٹ کا کہنا ہے کہ انھوں نے جب سے ہوش سنبھالا یہ کیمرہ ان کی زندگی کا حصہ رہا ہے۔ ان کا کہنا تھا کہ ان کے والد اسی کیمرے سے تصاویر کھینچا کرتے تھے۔

اس کیمرے کے ملنے کے 70 سال بعد تھامسن کی بیٹی نے یہ کیمرہ نیدرلینڈز کے عجائب گھر کو پیش کیا ہے۔