اجمل کمال کراچی

متعدد تاریخی عوامل کے نتیجے میں سندھ کی سرزمین میں ہندو دھرم کا ایک نرم، زیادہ انسان دوست روپ پایا جاتا تھا۔ بھگتی اور صوفی تحریک کی روایات سے، اور بعد کے دور میں گرو نانک کے سکھ مت سے گہرے طور پر متاثر ہونے کے باعث، یہاں ایسے بہت سے لوگ آباد تھے جن کے عقائد پر ان مختلف روحانی تحریکوں کے اثرات پائے جاتے تھے اور جو خود کو کسی واحد مذہبی ضابطے سے وابستہ کرنا دشوار اور نامناسب سمجھتے تھے۔ مثلاً ان میں سے ایک بڑا گروہ خود کو ’نانک پنتھی‘ کہتا اور سکھ مذہب کی ظاہری علامات استعمال نہ کرتے ہوئے بھی خود کو سکھ سمجھتا تھا۔ ہیرانند کے آباواجداد اسی فرقے سے تعلق رکھتے تھے۔ان کے سوانح نگاردیوان ڈیارام گدومل شاہانی، جو خود بھی سندھ کی نمایاں شخصیات میں سے تھے، کہتے ہیں کہ سکھ مذہب کا خانہ پہلی بار 1891کی مردم شماری کے فارم میں شامل کیا گیا، لیکن یہ انتخاب بمبئی پریذیڈنسی کے رہنے والوں کو حاصل نہ تھا، اس لیے ان کے خاندان نے مجبوراً خود کو ہندو لکھوا دیا۔گدومل کے مطابق بنگال میں برہمو سماج کے پیروکار بھی خود کو ہندو کہنے سے احتراز کرتے تھے۔

سندھ کے ہندو دھرم کی ایک اور خاص بات یہ تھی کہ یہاں ذات پات کی صورت حال ہندوستان کے دوسرے علاقوں کی بہ نسبت خاصی نرم تھی۔ اس کے باوجود بہت سی نامناسب مذہبی روایتیں اورسماجی رسمیں تھیں جن کی اصلاح کی ضرورت تھی۔1843میں سندھ فتح کرنے کے بعد انگریز یہاں کے صدرمقام کو حیدرآباد سے کراچی لے گئے تھے اور 1847 میں سندھ کو بمبئی پریذیڈنسی کا حصہ بنا دیا گیا۔ سندھ میں جدید تعلیم کا آغاز اس وقت ہوا جب فرنگی حکمرانوں نے حیدرآباد، کراچی اور شکارپور میں ’نارمل پریکٹسنگ سکول‘ شروع کیے۔ لیکن سندھ کے کئی باشعور لوگوں کا خیال تھا کہ یہاں تعلیم کے، خصوصاً لڑکیوں کی تعلیم کے فروغ اور اس کے علاوہ سماجی اور مذہبی اصلاح کے لیے اور بھی بہت کچھ کرنا ضروری ہوگا۔

ان خیالات کے باعث سندھ ان اصلاحی تحریکوں کے لیے زرخیز زمین کی حیثیت رکھتا تھا جو انیسویں صدی کے نصف اول میں بنگال میں شروع ہوئی تھیں جن میں سب سے اہم 1830 میں راجہ رام موہن رائے کی شروع کی ہوئی ’برہمو سماج‘ کی تحریک تھی۔

ہیرانند کے بڑے بھائی نول رائے شوقی رام نے، جو ان سے پندرہ برس بڑے تھے، سندھ کے ہندو سماج میں پائی جانے والی سماجی برائیوں کے خاتمے کی کوششیں شروع کر دی تھیں۔انہوں نے بنگال میں تبدیلی کی لہروں سے متاثر ہو کر ’سکھ سبھا‘ قائم کی، جس نے بعد میں ’سندھ سبھا‘ کا نام پایا اور آخرکار سندھ میں برہمو سماج کا روپ اختیار کر لیا۔ وہ 1873 میں کلکتہ میں برہمو سماج کے رہنما کیشب چندرسین سے مل بھی چکے تھے اور ان کی کوششوں سے حیدرآباد میں موجودہ سول ہسپتال کے نزدیک برہمو نووِدھان مندر قائم ہوا، جس کی عمارت کے احاطے میں ایک وسیع خوبصورت باغ تھا۔ اس عمارت کا افتتاح ستمبر 1875میں ستیندر ناتھ ٹیگور نے کیا جو حیدرآباد کے اُس وقت کے سیشن جج مہارِشی دیوندرناتھ ٹیگور کے بیٹے تھے۔

حیدرآباد میں پہلا گرلز سکول  حیدرآباد لوٹ کر ہیرانند نے نول رائے کے ساتھ جدید تعلیم کی ’یونین اکیڈمی‘ قائم کی۔ انہوں نے حیدرآباد میں پہلا گرلز سکول قائم کیا جہاں ان کی درخواست پر دو گھوش بہنیں لکھنؤ سے پڑھانے کے لیے آئیں

1884 میں سندھ واپس آ کر ہیرانند نے کراچی سے دو اخباروں ’سندھ سدھار‘ (سندھی) اور ’سندھ ٹائمز‘ (انگریزی) کی ادارت شروع کی۔ لیکن جلد ہی انہیں احساس ہوا کہ انہیں سندھ میں سماجی کام میں عملی حصہ لینا چاہیے۔ چنانچہ 1888 میں حیدرآباد لوٹ کر ہیرانند نے نول رائے کے ساتھ جدید تعلیم کی ’یونین اکیڈمی‘ قائم کی۔ انہوں نے حیدرآباد میں پہلا گرلز سکول قائم کیا جہاں ان کی درخواست پر دو گھوش بہنیں لکھنؤ سے پڑھانے کے لیے آئیں۔ تاہم ہیرانند نے صحافت کے میدان میں بھی کام جاری رکھا اور 1890کے لگ بھگ حیدرآباد کی ہندو سوشل ریفارم ایسوسی ایشن کے جاری کیے ہوئے دو رسالوں ’سرسوتی‘ اور ’سدھار پترِکا‘ کی ادارت کی۔ جن دوسرے فلاحی اداروں کے قیام میں ہیرانند نے حصہ لیا ان میں کراچی کے علاقے منگھوپیر میں کوڑھ کے علاج کا مرکز اور شکارپور میں ایک یتیم خانہ شامل تھا۔

لڑکیوں میں تعلیم کا فروغ ہیرانند کے دل کے نہایت قریب تھا، چنانچہ وہ اپنی بیٹیوں کو ہندوستان میں دستیاب بہترین تعلیم مہیا کرنا چاہتے تھے۔ یہی وجہ تھی کہ وہ اپنی دو بیٹیوں، لکشمی اور رامی ، کو بانکی پور (بہار) لے کر گئے تاکہ انہیں پرکاش چندر رائے کے قائم کیے ہوئے اگھور کامنی گرلز سکول میں داخل کرا سکیں۔ یہ تینوں، ہیرانند کے دوست پادری پروموتھو لال سین کے ہمراہ، سکھر، لاہور اور لکھنؤ کے راستے بانکی پور پہنچے، جہاں ہیرانند کو اچانک ہیضے نے آ لیا اور 11 جولائی 1893کو وہیں انہوں نے انتقال کیا۔ ان کے بڑے بھائی نول رائے بھی اسی سال نومبر میں چل بسے۔ان دونوں بھائیوں کی یاد میں یونین اکیڈمی کا نام بدل کر نول رائے ہیرانند (یا این ایچ) اکیڈمی رکھ دیا گیا۔

سندھی کے معروف ادیب، مترجم اور اسکالر ولی رام ولبھ ، جنہوں نے گدومل کی تحریرکردہ انگریزی کتاب کی حال ہی میں دوبارہ شائع ہونے والی سندھی تلخیص ’سندھ جی آتما‘ کا پیش لفظ لکھا ہے، ہمیں بتاتے ہیں کہ حیدرآباد کے برہمونووِدھان مندر پر کیا گزری جس کے احاطے میں ہیرانند اور نول رائے آڈوانی کی سمادھیاں واقع تھیں۔تقسیم ہند کے بعد مندر کو متروکہ جائیداد قرار دے کر ایک مہاجر کرنل کو الاٹ کر دیا گیا۔ 1970کی دہائی میں اس عمارت کو ڈھا کر اس کی جگہ حسین سکوائر کے نام کی کثیرمنزلہ عمارت تعمیر کی گئی جس کی زمینی منزل پر لبرٹی مارکیٹ اور اوپر کی تین منزلوں پر فلیٹ واقع ہیں۔

رسالہ روڈ پر واقع این ایچ اکیڈمی کی عمارت اب گورنمنٹ ہائی سکول نمبر1، فاطمہ گرلز ہائی سکول اور سندھ لا کالج کے استعمال میں ہے۔ ستمبر 2005 میں ولی رام ولبھ نے ہائی سکول جا کر نئے تعینات ہونے والے پرنسپل، نورمحمد ٹالپر، سے ملاقات کی جن کو اس عمارت کے ماضی کی کچھ خبر نہ تھی۔ تاہم ایک پرانے استاد عبدالکریم راجپوت نے انہیں عمارت کا دورہ کرایا۔ قدیم گھسی ہوئی دیواروں، چھتوں، فرش اور زینوں، اور زنگ خوردہ ریلنگوں کے باوجود عمارت متاثرکن معلوم ہوتی تھی۔ عمارت کے سامنے والے برآمدے کے دو ستونوں پر انہیں

ہیرانند کے بڑے بھائی نول رائے  ہیرانند کے بڑے بھائی نول رائے شوقی رام نے، جو ان سے پندرہ برس بڑے تھے، سندھ کے ہندو سماج میں پائی جانے والی سماجی برائیوں کے خاتمے کی کوششیں شروع کر دی تھیں۔انہوں نے بنگال میں تبدیلی کی لہروں سے متاثر ہو کر ’سکھ سبھا‘ قائم کی، جس نے بعد میں ’سندھ سبھا‘ کا نام پایا

اور اس غیرمتوقع مہربانی کی وجہ یہ تھی کہ اگست 2005 میں بھارتیہ جنتا پارٹی کے لیڈر لال کرشن آڈوانی، جو نفرت اور جنون پر مبنی خون آلود سیاست کے لیے جانے جاتے ہیں، پاکستان کے دورے پر تھے اور ان کے میزبانوں کا خیال تھاکہ شاید وہ حیدرآباد کی قدیم این ایچ اکیڈمی دیکھنے کی فرمائش کریں۔ اس خطے کی تاریخ کے دو ممتاز مصلحوں کی یاد کو عزت بخشنا اس اقدام کا سبب ہرگز نہیں تھا۔ مگر خیر، سرحدپار کے فرقہ پرست سیاست دان نے بھی اپنے سے پہلے گزرے ہوئے ان آڈوانی بھائیوں کے نام اور کام سے قطعی دلچسپی نہیں دکھائی جوان سے کہیں بہترانسان اور اپنے سماج کے کہیں زیادہ مفید شہری تھے۔