اجمل کمال کراچی

’نقاط‘ کے تیسرے شمارے کی ایک اہم تحریر افتخار نسیم کا ایک انٹرویو تھا جو عرفان احمد عرفی نے اپنے نیویارک کے سفر کے دوران مختلف ملاقاتوں میں لیا تھا

اردو کے رسالوں کے اداریوں میں مکالمے اور بحث مباحثے کی ضرورت پر ہمیشہ زور دیا جاتا رہا ہے، لیکن اگر اس سے مراد اردو دنیا میں کسی دوسرے نقطۂ نظر کے سامنے آنے کی گنجائش فراہم کرنا اور اسے سمجھنے کی کوشش کرنا ہے تو کہا جا سکتا ہے کہ ہمارے یہاں مکالمے اور بحث مباحثے کا کوئی خاص رواج نہیں رہا۔

شخصی مناقشے اور معرکے تو ادبی رسالوں میں بہت دیکھنے کو مل جاتے ہیں، لیکن اگر آپ ادبی رسالوں میں ہونے والی بحثوں کے ذریعے معاشرے میں آنے والی تبدیلیوں اور دورحاضر کے تہذیبی مسائل کی جھلکیاں دیکھنا چاہیں تو زیادہ امکان یہی ہے کہ آپ کو مایوسی کا سامنا کرنا ہوگا۔ اردو رسالوں میں پائی جانے والی بحثوں کی ایک عام قسم وہ ہے جن میں مثلاً انشائیہ یا غزل جیسی کسی صنف کی برتری اور کمتری پر زوردار انداز میں اظہار خیال کیا جاتا ہے اور دوسری قسم وہ جو شخصی مناقشوں پر مشتمل ہے۔

اس صورت حال کی ایک وجہ یہ بھی رہی ہے کہ اردو کے پرانے اور معتبر ادبی رسالے ایک ایک کر کے بند ہوتے چلے گئے یا اپنا معیار اور اعتبار برقرار نہ رکھ سکے۔ لیکن حوصلہ افزا بات یہ ہے کہ صورت حال کا یہ عنصر اب تبدیل ہوتا دکھائی دے رہا ہے اور پچھلے چند برسوں میں متعدد نئے ادبی رسالے جاری ہوئے ہیں۔ یہ رسالے عموماً ایسی پابندی سے شائع نہیں ہوتے جیسے مثلاً ماہنامہ ’افکار‘ شائع ہوتا تھا، لیکن چونکہ ان کے پڑھنے والے (اور بہت سے لکھنے والے بھی) مشترک ہیں اس لیے آسانی یہ ہے کہ کسی ایک رسالے میں کسی موضوع پر شروع ہونے والی بحث کو دوسرے رسالوں میں بھی جاری رکھا جا سکتا ہے۔

معروف شاعرہ فہمیدہ ریاض نے کراچی سے شائع ہونے والے رسالے دنیا زاد کے ایک شمارہ میں شائع ہونے والی غزلوں سے اکتا کر مدیر کے نام ایک مراسلہ تحریر کیا جس میں نوجوان غزل گو حضرات کو نظم کی صنف میں طبع آزمائی کرنے کا مشورہ دیا۔

ظفر اقبال نے اپنے تبصرے میں مترجم شاعرہ کی یہ دلچسپ ہدایت نقل کی ہے: ’یہ ترجمہ بہرحال ’آسان اردو‘ والوں کے لیے نہیں کیا گیا۔ جو خواتین و حضرات اردو شاعری کے اساتذہ کا کلام نہیں سمجھ سکتے وہ اس کتاب کو فی الفور طاق پر رکھ دیں تو مترجم کو چنداں اعتراض نہیں۔‘ اس ہدایت پر ظفراقبال کا تبصرہ بھی اتنا ہی دلچسپ ہے: جس شاعری سے لطف اٹھایا جا سکتا ہو سمجھ میں بھی وہی آتی ہے جب کہ شاعری کو سمجھنے کی خاطر پڑھنا آج کے قاری کے لیے محض دردِ سر ہی کا درجہ رکھتا ہے۔ ...علاوہ ازیں، غزل کے نام پر جس ٹریش کے انبار لگائے جا رہے ہیں قاری تو اسی کی یبوست اور یکسانیت سے آخری حدوں تک بیزار ہے، چہ جائے کہ اسے سال ہا سال پہلے کی روٹین قسم کی شاعری کو ’سمجھنے‘ پر مامور کر دیا جائے‘۔

ظفر اقبال رومی کے ترجم پر تبصرے میں کہتے ہیں کہ ’جہاں تک تصوف کا تعلق ہے تو ’تصوف کے بارے میں یہ بات عام طور پر کہی جا سکتی ہے کہ یہ متوازی مذہب کی حیثیت رکھتا ہے جس میں نماز روزے کی کوئی پابندی نہیں، نیز لڑکوں بالوں سے جنسی آسودگی حاصل کرنا ایک معمول کی بات ہے۔ ...‘

اوپر ظفراقبال کی بطور غزل گو بسیارگوئی کا ذکر آیا تھا۔ یہ بھی مختلف رسالوں کے مراسلات کے کالم میں بحث کا موضوع رہتی ہے۔ ’دنیازاد‘ کے تازہ ترین شمارے میں ساقی فاروقی کا ایک مختصر مگر دھماکہ خیز خط شائع ہوا ہے جس میں انہوں نے ظفراقبال کی بقول ساقی ’بوگس‘ غزلوں پر اپنے پیمانۂ صبر کے لبریز ہونے کی اطلاع دی ہے اور اوکاڑہ جا کر ظفراقبال کو قتل کرنے کا ارادہ ظاہر کیا ہے۔ اس کے جواب میں ان کے مجروح کی یہ پھبتی بھی سینہ بہ سینہ گردش کر رہی ہے کہ ’چہ ساقی اور چہ ساقی کا شوربہ!‘ مذکورہ بحث سے دلچسپی رکھنے والے قارئین اس کے اگلے مرحلے کا تماشا دیکھنے کے لیے ’دنیازاد‘ کے اگلے شمارے کے بے تابی سے منتظر ہیں۔

اردو کے نئے رسالوں کے سلسلے میں ایک اہم بات یہ ہے کہ ان میں سے بعض رسالے ایسے مقامات سے نکل رہے ہیں جنھیں روایتی طور پر ادبی یا اشاعتی مراکز نہیں سمجھا جاتا تھا۔ ان میں سے ایک رسالہ ’نقاط‘ فیصل آباد سے نوجوان ادیب اور شاعر قاسم یعقوب کی ادارت میں شائع ہونا شروع ہوا ہے۔ اس کا پہلا شمارہ اپریل 2006 میں سامنے آیا تھا اور چوتھا شمارہ جون 2007 میں شائع ہوا ہے۔ ’نقاط‘ کے تیسرے شمارے کی ایک اہم تحریر افتخار نسیم کا ایک انٹرویو تھا جو عرفان احمد عرفی نے اپنے نیویارک کے سفر کے دوران مختلف ملاقاتوں میں لیا تھا۔ یہ انٹرویو جسے ’چاپ‘ کے عنوان سے شائع کیا گیا، بلاشبہ اردو کے ادبی رسالوں کی حد تک اپنی نوعیت کی منفرد تحریر ہے۔

اس ’نقاط‘ میں افتخار نسیم نے اپنے ’گے‘ ہونے کے تجربے کو پاکستان اور امریکہ کے ایک دوسرے سے بنیادی طور پر مختلف معاشروں کے پس منظر میں بڑی خوبی، صاف گوئی اور گہرائی سے بیان کیا ہے

ان میں سے بعض ردعمل تو پاکستانی معاشرے کے قدیم تعصبات کا اظہار کرتے ہیں اور کسی تعجب کا باعث نہیں بنتے۔ مثلاً ’کیا افتخار نسیم اس بات پر فخر کرتے ہیں کہ وہ جس مکروہ زندگی کو گزار رہے ہیں اس کا برملا اظہار کر کے وہ کسی اخلاقی بلندی پر فائز ہو گئے ہیں؟‘ لیکن انکشاف کی بات یہ ہے کہ اس انٹرویو نے کئی پڑھنے والوں کو سوچنے اور اس میں اٹھائے گئے سوالات پر غور کرنے پر آمادہ کیا۔ ان میں سے ایک قاری کا خیال ہے کہ ’شاید ہمیں سماجی قبولیت کی حدوں کو وسعت دینے کی ضرورت ہے‘۔