وسعت اللہ خان
|  |
|  نیپال میں ایمرجنسی کے نفاذ پر امریکہ خاموش ہے |
کونڈولیزا رائس نے وزیرِ خارجہ بننے کے بعد اپنے پہلے بین الاقوامی دورے میں ماسکو میں بھی قیام کیا اور روس کو مشورہ دیا کہ اگر وہ مغرب سے قریبی تعلقات قائم کرنے کا خواہش مند ہے تو اسے جمہوری اداروں کو مستحکم کرنے کے ساتھ ساتھ بنیادی آزادیوں اور ذرائع ابلاغ کی آزادی کو بھی یقینی بنانا ہوگا۔ مس رائس کے باس جارج بش نے دو فروری کو کانگریس سے اپنے سالانہ اسٹیٹ آف دی یونین خطاب میں کہا ’ہمارے دشمنوں کی کوشش یہ ہے کہ وہ ایسا نظام مسلط کریں جس میں ایک چھوٹا سا خود ساختہ گروہ زندگی کے ہر شعبے پر قابض ہوکر سلطنتِ ظلم کو توسیع دینے کی کوشش کرے۔ جبکہ ہمارا مقصد آزادوخودمختار ممالک کی ایسی برادری تشکیل دینا ہے جس میں حکومتیں اپنے عوام کے سامنے جوابدہ ہوں۔‘ جارج بش کے اس خطاب سے چند روز پہلے ہی امریکہ کے ایک دوست ملک نیپال کے شاہ گیانندر نے پارلیمانی نظام کی بساط لپیٹ کر غیر اعلانیہ مارشل لا لگادیا۔ تمام بنیادی شہری آزادیاں معطل کردی گئیں۔ ذرائع ابلاغ پر سنسر شپ نافذ ہوگئ اور سیاستدانوں اور صحافیوں کی گرفتاریاں شروع ہوگئیں۔تین برس میں یہ دوسری مرتبہ ہے جب بادشاہ نے اختیارات اپنے ہاتھ میں لیے ہیں۔
نیپال وہ ملک ہے جہاں عالمی بینک کے مطابق بیالیس فیصد آبادی خطِ غربت سے نیچے زندگی بسر کررہی ہے اور کسی بھی بےچینی یا بغاوت کے لیے بہترین خام مال ہے۔ انہی نیپالیوں نے اب سے پندرہ برس پہلے سینکڑوں افراد کی قربانی اور ہزاروں کی گرفتاریاں دے کر اپنے لیے مطلق العنان بادشاہت سے جمہوریت چھینی تھی۔جس وقت بادشاہ نے ملک میں پارلیمانی نظام کی بساط لپیٹی اس سے کچھ ہی دن پہلے امریکہ نے نیپالی فوج کی دہشت گردی کے خلاف جنگ کو موثر بنانے کے لئے سترہ ملین ڈالر مالیت کی بیس ہزار سب مشین گنیں اور رات کو دیکھنے والے آلات فراہم کرنے کی منظوری دی۔ اسوقت اسلحے کی عالمی تجارت میں امریکہ کا حصہ پینتالیس فیصد سے زائد ہے اور جن ایک سوچون ممالک کو امریکی اسلحہ بیچا جاتا ہے ان میں سے بیالیس کے بارے میں امریکی محکمہ خارجہ کی رائے یہ ہے کہ وہاں جمہوری اور انسانی حقوق پامال ہورہے ہیں اور نیپال بھی محکمہ خارجہ کی اسی فہرست میں شامل ہے جہاں پچھلے آٹھ برس کے دوران سرکاری دستوں اور ماؤنواز یونائیٹڈ پاپولر فرنٹ کے درمیان جاری چھاپہ مار جنگ میں گیارہ ہزار سے زائد ہلاکتیں ہو چکی ہیں۔آٹھ سو سے زائد لوگ لاپتہ ہیں ان میں سے چھ سو کے لگ بھگ کے بارے میں کہا جاتا ہے کہ سرکاری دستوں نے اغوا کئے۔ نیپال ان ملکوں میں نہیں ہے جن میں امریکہ پہلی بار جمہوریت کا چراغ روشن کرنا چاہ رہا ہے بلکہ یہ ان ملکوں میں سے ہے جہاں جمہوریت کی بساط لپیٹی گئی ہے لیکن تاحال امریکہ کا نیپال میں ہونے والے تازہ واقعات پر کوئی ردِعمل سامنے نہیں آ سکا ہے۔ صدر بش نے اسٹیٹ آف دی یونین خطاب میں کہا
’ہماری ذمہ داری ہے کہ آنے والی امریکی پود کے لیے ایک محفوظ امریکہ چھوڑیں۔ ہم اپنے بچوں تک آزادی کا وہ اثاثہ منتقل کریں جس سے ہم فیضیاب ہیں اور اس آزادی میں سب سے بڑی آزادی خوف سے آزادی ہے۔‘ تو کیا خوف سے آزادی صرف امریکی بچوں کا ہی پیدائشی حق ہے ؟۔ | 
یہ صفحہ دوست کو ای میل کیجیئے
پرِنٹ کریں
