وسعت اللہ خان بی بی سی اردو ڈاٹ کام، لندن

مشرف کی وردی پوش جہموریت

پچھلے تینتیس برس میں یہ دوسری مرتبہ ہے کہ پاکستانی فوجی قیادت نے علمِ سیاسیات میں ایک تازہ فلسفہ متعارف کرایا ہے۔

انیس سو اکہتر میں اس فوجی قیادت نے سیاسیات کا یہ کلاسیکی فلسفہ غلط ثابت کر دکھایا کہ ہمیشہ اقلیت اکثریت سے علیحدگی اختیار کرتی ہے۔فوجی قیادت نے اپنی سیاسی پالیسی سے ثابت کیا کہ اکثریت بھی اقلیت سے تنگ آ کر نہ صرف بھاگ سکتی ہے بلکہ علیحدہ نام سے علیحدہ ملک بھی بنا سکتی ہے۔

وردی اور شیروانی کی یکجائی کا مشرف جمہوری فارمولا کوئی ہوائی فارمولا نہیں ہے بلکہ اسے پاکستانی پارلیمنٹ اور پنجاب اور سندھ کے اسمبلی ارکان کی اکثریت کی تائید و حمائت بھی حاصل ہے۔ صرف بلوچستان اور سرحد کی اسمبلیوں نے اس فارمولے کی قدر نہیں کی حالانکہ بقول صدر مشرف یہ فارمولا ملک اور جمہوریت کے بہترین مفاد میں ہے۔

ویسے بھی کوئی اچھا فارمولا کسی فرد یا ملک کی میراث نہیں ہوتا بلکہ ثوابِ جاریہ کی طرح ہوتا ہے۔ جو بھی اپنے اپنے ظرف کے مطابق اس سے جتنا بھی فیض اٹھالے۔

ذرا تصور کیجئے کہ وردی اور شیروانی کی یکجائی پر مبنی مشرف جمہوری فارمولا اگر دیگر ممالک میں بطور ماڈل مقبول ہونا شروع ہوجائے تو کیا منظر ہوگا۔
بھارت کے صدر اور بری فوج کے سربراہ جنرل اے پی جے عبدالکلام۔
سری لنکا کی صدر اور چیف آف آرمی اسٹاف لیفٹیننٹ جنرل چندریکا کمارا تنگا۔
بنگلہ دیش کی وزیراعظم اور سپاہ سالار میجر جنرل خالدہ ضیا۔
ایران کے روحانی پیشوا اور زمینی فوج کے سربراہ فیلڈمارشل آیت اللہ علی خامنہ ای وغیرہ وغیرہ وغیرہ۔

صدر مشرف بارہا کہہ چکے ہیں کہ وہ پاکستان کو ایک جدید روشن خیال مسلمان جمہوری ملک بنانا چاہتے ہیں۔اور انکا وردی شیروانی مکس نظریہ جمہوریت اس منزل کی جانب اب تک کا سب سے اہم قدم ہے۔