وسعت اللہ خان بی بی سی اردو ڈاٹ کام، لندن

نئے سال کی آمد کی خوشیاں ( فائل فوٹو)

اس وقت جنرل ضیا الحق کا دور نیا نیا شروع ہوا تھا۔ اور ’ہیپی نئیو ائیر‘ کہنا بھی آمریت کے خلاف مزاحمت کا حصہ لگتا تھا۔ لیکن سترہ اٹھارہ برس کی عمر میں زندگی کی سفاکیوں سے زیادہ ساتھ کے لڑکے لڑکیوں کی سالگرہ کا دن ، نئیو ائیر نائٹ اور ویلنٹائین ڈے یاد رہتا ہے۔ لگتا ہے کہ ابھی تو اک عمر پڑی ہے۔ پریشانی کس بات کی ہے۔ زندگی صرف آگے کی طرف بہتی ہے۔ آنے والا دن، مہینہ اور سال جانے والے دن مہینے اور سال سے زیادہ خوشنما لگتا ہے۔ بس افغان جنگ ختم ہو جائے۔ بس ذرا ضیا الحق کا دور بدل جائے۔ سب کچھ ٹھیک ہو جائے گا۔ ویسے بھی تبدیلی کا پہیہ کون روک سکا ہے !

میری نسل جو ضیا الحق کے زمانے میں سترہ، اٹھارہ برس کی تھی۔آج عمر کی چالیس سے زیادہ سیڑھیاں طے کر چکی ہے۔اور لگتا یوں ہے کہ جسے ہم اس زمانے میں آگے کا سفر سمجھتے تھے۔ اصل میں وہ دائرے میں سفر تھا۔ لگتا ہے جیسے بائیس یکم جنوری، بائیس دن میں گزر گئے۔

جب میں نے نیا نیا ہیپی نیو ائیر کہنا سیکھا تھا تو وقت کی کنوئیر بیلٹ پر میرے ساتھ ساتھ کئی چہرے تھے۔ جانے وہ کب اتر گئے۔ جانے انہیں کون لے گیا۔

آج سے بائیس برس پہلے جو اکتیس دسمبر آیا تھا۔اس دن بھی میرا دوست رفیق دھوبی کپڑوں پر بھاری سی استری لئے جھکا ہوا تھا۔ اس اکتیس دسمبر کو بھی اس دنیا میں اربوں رفیق دھوبی جس طرح کی زندگی گزار رہے ہوں گے۔ پہلی جنوری کو بھی انکی زندگی میں بال برابر فرق نہیں آئے گا۔

لیکن اسی دنیا میں کروڑوں نو عمر لڑکے لڑکیاں نئے سال کا عہد نامہ سوچنے میں بھی مصروف ہوں گے۔ کتنا اچھا ہو کہ یہ نوعمر لوگ جب میری عمر کو پہنچیں تو اس قنوطیت اور بے زاری میں مبتلا نہ ہوں جس کا میں شکار ہوں۔ہیپی نئیو ائیر۔