| دو جولائی: ’موڑ کے نزدیک ہی واقع ہے مروڑ‘ |
شاید آپ نے یہ گانا سنا ہو: ’ہاں اسی موڑ پر‘، یا ہو سکتا ہے آپ نے یہ والا سنا ہو: ’اِس موڑ سے آتے ہیں کچھ سست قدم راستے‘ مگر چند موڑ ایسے بھی آتے ہیں کہ جہاں سستی کی بجائے پھرتی کا مظاہرہ کرنا پڑتا ہے ورنہ بڑا شرمندہ ہونا پڑتا ہے۔ موڑ کے نزدیک ہی واقع ہے مروڑ کبھی کبھی اپنی یا کسی دوسرے کی بیوی کے پیار بھرے ہاتھوں کے پکے ہوئے کھانے سے بھی اُٹھ سکتا ہے یہ مروڑ اور اگر ’اپنی‘ سے شکایت کی جائے تو شوہر حضرات کی گردن بھی مروڑی جا سکتی ہے تاکہ مُڑ مُڑ کے شوہر کو یہ بات یاد آئے اور عبرت دلائے۔ پچھلے دنوں خالی پیٹ بہت ساری دعائیں کھانے سے عجیب پیچ و تاب اور نشیب و فراز سے وجود میں آ رہے تھے اور یہ جانتے ہوئے بھی کہ مجھے کہاں جانا چاہئے، میں وہاں نہیں جا سکتی تھی۔ اس لئے کہ ایمرجنسی بنیاد پر مجھے کچھ ایک ہیڈلائن لکھنی تھی جس میں لوگوں کو ایک کروڑ تک جیتنے کی خوشخبری دینی تھی۔ آپ نے پیٹ پکڑ کر ہنسنا سنا ہوگا۔ میں اس وقت پیٹ پکڑ کر لکھ رہی تھی۔ (آپ کو یہاں مجھ سے ہمدردی کرنی چاہیئے اور مجھے پتہ ہے کہ شاہدہ اکرام تو کریں گی کیونکہ وہ میرا ’درد، سمجھ سکتی ہیں۔) میں پیٹ کی ہلکی نہیں ہوں مگر اُس وقت میری زندگی کا اولین مقصد ہی یہی تھا۔۔۔۔اور دوسری جانب میری ٹیم کے ممبرز ہمہ تن گوش تھے۔ تیسری جانب مجھے رات کو نوش فرمائی چڑھائی کی کڑاہی کے گوشت پر مکمل شک تھا۔ بہرحال، بُرا حال اور پھر میرے سینیئر باس آ پہنچے، جن کے نہ پیٹ میں آنت نہ منہ میں دانت۔ تھوڑے بہت دانت تو تھے مگر ہیڈ لائن پڑھ کر اتنے کچکچائے کہ باقی نہ رہے۔ کیونکہ دل کی بات صرف زباں تک آنی چاہیئے، مگر یہاں وہ منظرِعام پر آ چکی تھی۔ ہیڈ لائن تھی ’زندگی میں آیا ایک نیا مروڑ، جیتو کم از کم ایک کروڑ،
آپ کی زندگی میں بھی آ سکتا ہے ایسا چڑھائی والا موڑ۔‘ آخر پیٹ تو سب کے ساتھ لگا ہے۔
محمد یوسف اقبال، دبئی
واہ شیما جی آپ بہت ہنساتی ہیں۔ یہ مروڑ کا لفظ تو ہم نے بچپن میں سنا تھا۔ اپنی امی سے سنا تھا اور آج آپ سے سن رہے ہیں۔ آپ کی باتوں سے لگاتا ہے کہ آپ کے ارد گرد کے لوگ خوش رہتے ہوں گے اور آپ اس ہی طرح سب کو ہنساتی ہوں گی۔ اور ہاں مروڑ کا ایک علاج ہے، 7up کی بوتل میں تھوڑا نمک اور لیموں ڈال کر گٹا گٹ پی جائیں، آرام ملے گا۔ اسداللہ نظامانی، ٹنڈو قیصر
موڑ تو زندگی کے راستے میں بڑے آئے اور آتے رہیں گے مگر بات یہ ہے کہ اگر کسی موڑ پر رک گیا تو پیچھے سے آنے والے سے ضرور ٹکر لگا کر بیٹھے گا۔ یا پھر وہ اس سے آگے نکل جائے گا۔ اس لیے جستجو کو جاری رکھو اور پھر دیکھو۔ کہتے ہیں نہ ’ہمت مرداں مدد خدا‘۔ شازیہ خان، کراچی
نہیں شیما جی دونوں ہی گانے نہیں سنے میں نے تو ۔ لگتا ہے کہ بابائے قوم کے زمانے کے ہیں دونوں۔ بس یہ پہلی لائن ہی رائے دینے کے قابل ہے باقی تو سب آناپ شناپ لکھ دیا ہے آپ نے، نہ کوئی سر نہ کوئی پیر۔ عدنان محمد، لندن
شیما جی کیا بات ہے آپ کی۔ بلاگ بہت اچھا تھا۔ مجھے پڑھ کر بہت ہنسی آرہی ہے۔ بہت خوب۔ نعیم نجمی، کراچی
بجا فرمایا ہے۔ پیٹ سب کے ساتھ لگا ہے۔ بس فرق اس کے سائز اور نظام ہضم میں ہے۔ کسی کا پیٹ ٹینک، شپ، جہاز اور آبدوزیں بلکہ کچھ تو جانوروں کا چارہ تک کھا گئے مگر مجال ہے کہ کسی کے پیٹ میں معمولی سا مروڑ تک پڑا ہو۔ ویسے لگتا ہے آپ کے باس ایماندار ہیں جنہوں نے بتیسی عام سی لگوائی ہے۔ شکر کریں ان کی بتیسی پیٹ میں نہیں اتر گئی ورنہ اس کے بعد کیا ہوتا؟ یہ سوچ کر میرے پیٹ میں مروڑ پڑنا شروع ہو گیا ہے۔ ہا ہا ہا جاوید اقبال ملک، چکوال
شیما سسٹر آپ ایک اچھی لکھاری ہیں اور آپ کو پڑھنے والے مرد بھی ہیں صرف خواتین نہیں ہیں۔ اور آپ کو معلوم ہی ہوگا کہ پاکستان میں مرد حضرات خواتین کے رسالے شوق سے پڑھتے ہیں۔ خیر آپ نے اپنا درد سب کے ساتھ بانٹا، آپ کو راحت ملی ہوگی مگر مجھے اچھا نہیں لگا۔ کاش آپ اپنا یہ راض اپنے پاس ہی رکھتیں۔
| 
آپ کی آواز:پہلا صفحہ
