ذیشان الحسن عثمانی امریکہ

وطن عزیز میں ہوش سنبھالا تو مسلمانوں کے بہت سے فرقے، گروپ نظر آئے، کوئی بریلوی کہلایا تو کوئی دیوبندی، کوئی سنی تو کوئی شیعہ، کوئی ہری پگڑی والا تو کوئی سفید کرتے والا، کوئی نذر نیاز کا پابند تو کوئی درگاہوں پر جانے سے منکر وغیرہ وغیرہ۔ مگر اس طرح پیارے نبی (ص) کی ساری سنتیں جاری و ساری ہیں اور نماز روزے، حرام حلال، ختم نبوت پر کم و بیش سب ہی متفق نظر آئے۔ امریکہ آکر سارے مسلمان صرف دو گروپ میں نظر آئے: ایک ’مسلمان‘ اور دوسرے ’لِبرل مسلمان‘۔

’مسلمان ‘ اپنی قومی اور اسلامی روایات کو برقرار رکھنے کی کوششوں میں مگن تو ’لِبرل مسلمان‘ اپنے آپ کو انگریز ثابت کرنے پر تلے ہوئے، جیسا کہ ہم سب کو پتہ ہے کہ دین پر بحث کرنا خواہ کچھ پتہ ہو یا نہ ہو، ہم مسلمانوں کا سب سے پسندیدہ مشغلہ ہے۔ لہذا ہر دعوت اور گیدرِنگ میں یہ دونوں گروپ ایک دوسرے سے بحث میں مصروف نظر آتے ہیں۔

پہلا گروپ اپنے پاکستانی یا انڈین اور مسلمان ہونے پر فخر کرتا ہے اور اسلام کی وجہ سے نوکری یا تعلیم میں پیش آنے والی مشکلات کو جہاد جانتا ہے۔ دوسرا گروپ حلال و حرام کے چکر سے بےنیاز شلوار قمیض اور داڑھی کو برا بھلا کہتے ہوئے پایا گیا ہے۔ یہ گروپ شراب سے لیکر خنزیر تک اور انگریزی نام رکھنے سے لیکر غیرمسلم میں شادی تک ہر چیز کو جائز سمجھتا ہے۔ بہت سے لوگوں نے تو اپنے بچوں کے نام بھی ڈیوِڈ، جیکب، وغیرہ رکھے ہوئے ہیں، نام اور عادات سے ان کی شناخت جو ان کے لئے شرم کا باعث ہے چھپی رہے۔ ان کے لئے امریکہ ایک جنت ہے اور یہ اس کے خلاف کچھ نہیں سن سکتے، یہ لوگ آپ کو اکثر یہ کہتے نظر آئیں گے کہ:

’تمہارے پاکستان کا کیا ہوگا؟‘
’یہ مولوی کہاں لے جارہے ہیں تمہاری نسل کو؟‘
’میں تو پاکستان جاکر آلودگی اور گندے پانی سے تنگ آجاتا ہوں۔ (بھلے پاکستان میں تیس سال گزارے ہوں۔)

میں ایسے میں صرف ایک ہی جواب دیتا ہوں کہ اگر یہ ’ہمارے‘ کی بجائے ’تمہارا‘ پاکستان ہے تو آپ فکر نہ کریں، جیسے کہ دنیا میں موجود باقی سینکڑوں ممالک کی آپ بات نہیں کرتے تو بےچارے پاکستان کو ہی ہر بار بحث میں کیوں کھینچ لیتے ہیں۔ جب آپ کو یہی نہیں پتہ کہ مولوی ہوتا کیا ہے، کیسے بنتے ہیں تو ان کو گالیاں اور برا بھلا کہنے کا حق بھی نہیں آپ کو۔

ایک بار ایک دعوت میں ایک انگریز نے پوچھا کہ مجھے ’اللہ کی پِکچر دکھاؤ‘ وہ سمجھ رہا تھا کہ رام، رادھا کی طرح ہمارے پاس بھی اللہ کی مورتی یا پِکچر ہوتی ہے۔ مگر اس سے زیادہ حیرت اس بات پر ہوئی جب مسجد میں موجود مسلم والدین کے مسلم بچوں نے اعتکاف، شب برات اور شب معراج، کے ناموں سے قطعی لاعلمی ظاہر کی، انہیں کوئی آئڈیا نہیں تھا کہ یہ چیزیں کیا ہوتی ہیں، نہ ہی ناموں کا، نہ ہی ان کے پیچھے موجود کنسیپٹ کا۔

لیکن جہاں گیارہ ستمبر کے اتنے سارے نقصانات ہوئے، وہاں اس کا سب سے بڑا فائدہ یہ ہوا کہ اس واقعے نے مسلمانوں کے دونوں گروپوں کو بہت قریب کردیا۔ جو لوگ طرح طرح سے اپنے آپ کو مسلمان نہ ظاہر کرنے میں لگے ہوئےتھے وہ جان گئے کہ وہ آخرکار مسلمان ہی ہیں اورغیراقوام کبھی بھی انہیں ایکسیپٹ کرنے کو تیار نہیں ہیں، تو بہت سے نے فلاح اسی میں پائی کہ اپنی دنیا کو ہی لوٹ جائیں اور اب دوسرے گروپ کے بھی بہت سے افراد مسجد اور اس سے متعلق کاموں میں پیش پیش نظر آتے ہیں۔ امریکہ کے مسلمان جتنے گیارہ ستمبر کے بعد متحد ہوئے ہیں، سیاسی، معاشرتی اور معاشی طور پر اتنے وہ امریکہ کی تاریخ میں کبھی نہیں تھے۔

نوٹ: بی بی سی اردو ڈاٹ کام پر ’آپ کی آواز‘ کا صفحہ قارئین کا، قارئین کے لئے ہے۔ قارئین کے مضامین سے بی بی سی کا اتفاق کرنا ضروری نہیں ہے۔ اگر آپ بھی کسی موضوع پر کچھ لکھنا چاہتے ہیں تو لکھ بھیجیں۔