شارق مشہدی ادے پور، راجستھان

پاکستان کے ایک گاؤں کی ایک طالبہ

آج کل میں ریاست راجستھان میں ’سیوا مندر‘ نامی ایک این جی او سے منسلک ہوں جہاں ہم ادے پور کے چار گاؤوں میں مختلف برادریوں کے درمیان بہتر تعلقات کے لئے کوشش کررہے ہیں۔ کراوارا نامی گاؤں میں مسلم، پٹیل، براہمن اور پرجاپت برادریاں رہتی ہیں اور ان کے تعلقات گجرات فسادات کے بعد سے ٹھیک نہیں ہیں۔ زیادہ تر مسلم نوجوان روزی روٹی کے لئے کویت جانا چاہتے ہیں۔ دائچارہ گاؤں میں پٹیل برادری اور کچھ پسماندہ طبقے کی برادریاں بستی ہیں۔ یہاں خواتین گھریلو اور زراعتی کام کرتی ہیں۔ لڑکیوں کو صرف گاؤں میں ہی پرائمری اور مِڈل اسکول تک پڑھنے دیا جاتا ہے اور تعلیم مکمل کرنے کے لئے دوسرے گاؤں تک نہیں جانے دیا جاتا۔ کچھ ایسے ہی حالات پہاڑا اور کھراریوادا گاؤں میں ہیں۔

ہم نے ایک اینرجی ہاؤس یعنی توانائی گھر نامی مرکز قائم کیا ہے۔ اسے ہندی میں ہم اُرجا گھر کہتے ہیں جو کہ نوجوانوں، بچوں اور خواتین کے لئے ایک مشترکہ جگہ ہے جہاں ہم مختلف لوگوں کو اکٹھا کرنے کی کوشش کرتے ہیں۔ شروع میں ہم کمپیوٹر، ٹی وی، کیمرہ اور میوزِک سیسٹم وغیرہ فراہم کررہے ہیں تاکہ ان کے ذریعے خواتین اور بچے اپنے تخلیقی ذہن کا استعمال کرسکیں۔ آنے والے دنوں میں ہم کمیونیٹی ریڈیو، انٹرنیٹ، ریکارڈِنگ اور ایڈیٹنگ کے سامان مہیا کریں گے تاکہ لوگ اسے بہتری کے لئے استعمال کرسکیں۔

توانائی گھر اس گاؤں کے لوگوں کے لئے وسائل کے ایک مرکز کے طور پر ابھر کر آیا ہے۔ ایک کتاب گھر بھی ہے جس سے بچے اور دیگر افراد فائدہ اٹھاسکتے ہیں۔ یہاں مختلف موضوعات پر ایک ہزار دو سو کتابیں مہیا ہیں۔ گاندھی جینتی، افطار پارٹی، زیرو ٹالرنس ڈے، عید۔دیوالی ملن، ہولی ملن، وغیرہ پروگراموں کے ذریعے ہم مختلف برادریوں کے لوگوں کو ایک جگہ ملانے کی کوشش کرتے ہیں۔ کچھ ایسے ہی دیگر پروگرام ہم منعقد کرتے ہیں جو میں آپ کو اپنی آئندہ ڈائری میں بتاؤں گا۔ ضرورت اس بات کی ہے کہ ہم مثبت اقدام کے ذریعے اپنے علاقے میں کچھ کریں۔