شکیل اختر بی بی سی اردو ڈاٹ کام، دلی

	ریاستی پولیس کے کمانڈو دستوں کی تربیت کے لیے مختلف صوبوں ميں بیس انسدادِ دہشتگردی سکول کھولنے کی بھی تجویز ہے۔

دہشت گردی پر قابو پانے سے متعلق پارلیمنٹ میں ان دو بلوں کی تفصیل پیش کرتے ہوئے وزیر داخلہ پی چدامبرم نے کہا ’ایک قومی تفتیشی ادارہ یعنی این آئی اے قائم کیا جائے گا جو دہشت گردی کی نوعیت کے اعتبار سے صوبوں میں واقعات کی تفتیش کر سکے گا۔‘

ان بلوں میں خصوصی عدالتوں کے قیام کی بات کی گئی ہے جن کے جج ہائی کورٹ کے چیف جسٹس مقرر کریں گے۔ یہ عدالتیں روزانہ کی بنیاد پر مقدمے کی سماعت کریں گی ۔ اون کے فیصلوں کے خلاف ہائی کورٹ کی ڈویژن بنچ میں اپیل کی جا سکے گی جس کا فیصلہ تین مہینے کے اندر ہو گا۔

دوسرا بل ایک ترمیمی بل ہے جس کے تحت مشتبہ افراد کو تین مہینے کے بجائے چھ مہینے تک حراست میں رکھا جا سکے گا۔ لیکن یہ توسیع عدالت صرف اس بنیاد پر کرے گی کہ تفتیش میں پیش رفت ہو رہی ہے اور حراست میں توسیع ضروری ہے ۔

پولیس کے سامنے دیے گئے اقبالی بیان اور خفیہ طریقے سے ریکارڈ کی گئی دہشت گردوں کی بات چیت کو بھی ثبوت کے طور پر شامل کیا جانا چاہیے حزب اختلاف کے رہنما ایل کے اڈوانی

وزیر داخلہ نے کہا ’میں نے سخت قوانین اور حقوق کے درمیان ایک توازن پیدا کرنے کی کوشش کی ہے ۔‘

حزب اختاف کے رہنما ایل کے اڈوانی نے بل کا خیر مقدم کرتے ہوئے کہا کہ وہ پوٹا جیسے سخت قانون کے حق میں ہیں۔ انہوں نے کہا ’پولیس کے سامنے دیے گئے اقبالی بیان اور خفیہ طریقے سے ریکارڈ کی گئی دہشت گردوں کی بات چیت کو بھی ثبوت کے طور پر شامل کیا جانا چاہیے۔‘ تاہم انہوں نے کہا کہ وہ ان قانونی تجاویز کی حمایت کریں گے۔

سائنس اور ٹیکنالوجی کے وزیر اور سرکردہ وکیل کپل سبل نے بحث میں حصہ لیتے ہوئے کہا کہ ٹاڈا اور پوٹا جیسے سخت قوانین کا بڑے پیمانے پر غلط استعمال ہو رہا تھا جس کے سبب انہیں ختم کرنا پڑا۔ گودھرا ٹرین کے واقعے میں پوٹا کے تحت تقریباً سو مسلمانوں کی گرفتاری کی مثال دیتے ہوئے انہوں نے کہا’ نظر ثانی کمیٹی اور سپریم کورٹ کے احکامات کے باوجود یہ بے قصور افراد اس قانون کے سبب سات برس سے جیل میں ہیں ۔ ان کی ذمے داری کون لے گا۔‘

نظر ثانی کمیٹی اور سپریم کورٹ کے احکامات کے باوجود یہ بے قصور افراد اس قانون کے سبب سات برس سے جیل میں ہیں ۔ ان کی ذمے داری کون لے گا سائنس اور ٹیکنالوجی کے وزیر کپل سبل

بحث کے دوران اس وقت کچھ تلخی پیدا ہوئی جب ایک رکن نے مرکزی وزیر عبدالرحمن انتولے کے ایک ٹی وی انٹرویو پر سخت اعتراض کیا جس میں انہوں نے مبینہ طور پر اے ٹی ایس کے سربراہ ہیمنت کرکرے کی شدت پسندوں کے ہاتھوں ہلاکت کے بارے میں کچھ شبہات ظاہر کیے تھے۔

انٹرویو میں وہ مبینہ طور پر یہ جاننا چاہتے تھے کہ جب سارا واقعہ تاج اور اوبیرائے ہوٹل میں ہو رہا تھا تو انہیں کاما ہسپتال کس نے بھیجا جہاں کوئی خاص صورتحال نہیں تھی اور جہاں وہ مارے گئے۔

بحث کے اختتام پر دونوں بل منظور کر لیے گئے۔