بی جے پی کی جنوبی ہندوستان میں یہ پہلی حکومت ہے

پیر کو بی جے پی کے سینئر رہنما بی ایس یدوپا نے وزیراعلی کے عہدے کا حلف اٹھایا۔

ان کے ساتھ نئی کابینہ کے چار وزراء نے بھی حلف اٹھایاہے۔ حکومت کی حلف برداری کے ساتھ ہی گزشتہ ایک مہینے سے ریاست میں جاری صدر راج کا خاتمہ ہوگیاہے۔

ہندو قوم پرست جماعت بی جے پی کی جنوبی ہندوستان کی کسی ریاست میں یہ پہلی حکومت ہے۔

ادھر حکمراں اتحاد میں شامل جنتا دل سیکولر نے ابھی تک نائب وزیر اعلی کے عہدے کے لیے کسی نام کا اعلان نہيں کیا ہے۔ اطلاعات کے مطابق نائب وزیر اعلٰی سمیت جنتا دل سیکولر کے دیگر وزراء کے نام کا اعلان حکومت کے اعتماد کا ووٹ حاصل کرنے بعد کیا جائےگا۔

بی جے پی حکومت اعتماد کا ووٹ پندرہ نومبر کو حاصل کرے گی۔

تقریباً دو برس قبل ریاستی اسمبلی کے انتخابات میں کسی جماعت کو واضح اکثریت نہ ملنے کے بعد جنتادل سیکولر اور بی جے پی کے درمیان باری باری سے مخلوط حکومت سازي کا معاہدہ ہوا تھا اور پہلے جنتا دلی سیکولر نے بیس مہینے کے لیے حکومت بنائی تھی۔

گزشتہ مہینے کے اوائل میں حکومت کے بیس مہینے پورے ہونے کے بعد جنتا دل سیکولر اور بی جے پی کی مخلوط میں اقتدار کی منتقلی کے سوال پر تناز‏عہ کھڑا ہوگيا تھا جس کی وجہ سے اس وقت کے موجودہ وزیر اعلی ایچ ڈی کمارا سوامی کو آٹھ اکتوبر کو مستعفی ہونا پڑا تھا۔