ایچ ڈی کمارا سوامی نے پہلے اٹھارہ اکتوبر کو ریاستی اسمبلی کا اجلاس بلانے کا مطالبہ کیا تھا

انہوں نے پیر کی شام ریاستی گورنر سے مل کر انہیں اپنا استعفٰی پیش کیا۔

کرناٹک میں اتحادی بھارتیہ جنتا پارٹی (بی جے پی )کے حمایت واپس لینے کے فیصلے کے بعد جنتادل سیکولر کی مخلوط حکومت اقلیت میں آگئی تھی۔دونوں جماعتوں کے درمیان سمجھوتے کے مطابق جنتادل سیکولر کو تین اکتوبر کو حکومت کی سربراہی اتحادی بی جے پی کو منتقل کرنی تھی لیکن عین وقت پر وزيرِاعلٰی ایچ ڈی کمارا سوامی نے اس سے انکار کر دیا تھا۔

ایچ ڈی کمارا سوامی نے پہلے اٹھارہ اکتوبر کو ریاستی اسمبلی کا اجلاس بلانے کا مطالبہ کیا تھا تاکہ وہ اعتماد کا ووٹ حاصل کر سکیں لیکن کانگریس کے رہنماؤں کی گورنر سے ملاقات اور ان کی جانب سے حکومت برخاست کرنے کی درخواست کے بعد انہوں نے مستعفی ہونے کا فیصلہ کیا۔

یاد رہے کہ گزشتہ سنیچر کو بی جے پی کے سنئیر لیڈر یشونت سنہا نے کہا تھا کہ کرناٹک کے وزیرِاعلٰی ایچ ڈی کمارا سوامی کے والد اور سابق وزیرِاعظم ایچ ڈی ڈیوگوڑا نے اقتدار کی منتقلی سے متعلق نہ صرف سمجھوتے کی خلاف ورزی اور دھوکہ کیا ہے۔

ریاست کی مخلوط حکومت گزشتہ ایک ہفتے سے بحران کا شکار تھی اور گزشتہ منگل کو سیاسی حالات مزید سنگین ہوگئے تھے جب نائب وزيراعلٰی اور بی جے پی کے رہنما بی ایس یدیوروپا نے سبھی سترہ وزراء کا استعفے وزیراعلٰی کو سونپ دیے تھے۔

تقریباً دو برس قبل ریاستی اسمبلی انتخابات میں کسی جماعت کو واضح اکثریت نہ ملنے کے بعد جنتادل سیکولر اور بی جے پی کے درمیان باری باری سے مخلوط حکومت سازي کا معاہدہ ہوا تھا۔