صلاح الدین بی بی سی اردو ڈاٹ کام، دلی

	مون سون شمالی بھارت میں جون کے آخری میں پہنچتی ہے

محکمہ موسمیات کے ڈائریکٹر بی پی یادو نے بی بی سی کوبتایا ہے کہ جون کی ابتداء ہی سے حدت میں اضافہ ہونا شروع ہوا تھا اور فی الوقت شمال مغربی علاقوں میں اوسطاً بیالیس سے چوالیس ڈگری تک درجہ حرارت ہے۔’ اس کی وجہ یہ ہے کہ کئی دنوں سے گرج دار طوفانی ہواؤں کے ساتھ بارش کی بوچھاریں نہیں آئی ہیں اور فی الوقت شمال مغرب کی طرف سے ہوا چل رہی ہے جس سےگرمی میں اضافہ ہوا ہے۔‘

	موسم گرما کے پھلوں کی فروخت میں اضافہ ہو گیا ہے

لو سے زیادہ اموات ریاست اتر پردیش میں ہوئی ہیں جہاں ایک تخمینے کے مطابق پچیس افراد ہلاک ہوئے ہیں۔ گزشتہ روز لکھنؤ میں درجہ حرارت چوالیس ڈگری تک پہنچ گيا تھا۔ راجستھان میں چار اور پنجاب میں پانچ افراد ہلاک ہوچکے ہیں۔ ان ریاستوں کے بیشتر حصوں میں درجہ حرارت معمول سے چار یا پانچ ڈگری زیادہ چل رہا ہے۔

دارالحکومت دلی میں بھی زبردست گرمی پڑ رہی ہے۔ ایسے موسم میں دلی میں لوڈ شیڈنگ ایک عام بات ہے جس سے عوام کودوہری پریشانیوں کا سامنا کرنا پڑتا ہے۔ دلی میں مستقل تین روز سے رات کے گیارہ بجے تک جھلستی ہوئی لو چل رہی ہے۔

	جنوبی بھارت میں مون سون کی لہر پہنچ گئی ہے

جنوبی ہندوستان میں مون سون پہنچ چکا ہے اور کیرلا، مہاراشٹر اور آندھرا پردیش کے کئی علاقوں میں بارشیں شروع ہوگئی ہیں جس سے درجہ حرارت بھی کم ہوا ہے۔