صلاح الدین
بی بی سی اردو ڈاٹ کام، دلی |  |
| | | آج کل درجہ حرارت معمول سے پانچ یا چھ ڈگری زیادہ ہے |
ہندوستان میں شمالی اور مرکزی ریاستوں کے بیشتر علاقے آج کل شدید گرمی اور لو کی کی لپیٹ میں ہیں۔ محکمہ موسمیات کا کہنا ہے کہ فی الوقت درجہ حرارت معمول سے پانچ یا چھ ڈگری زیادہ ہے البتہ چند روز کے بعد اس میں کمی کا امکان ہے۔ محکمہ موسمیات کے ڈائریکٹر بی پی یادو کا کہنا ہے کہ مدھیہ پردیش، راجستھان، مہا راشٹر، ہریانہ پنجاب اور دلی جیسے علاقوں میں زیادہ گرمی ہورہی ہے۔ انہوں نے بی بی سی اردو کو بتایا: ’ ان علاقوں میں معمول سے پانچ یا چھ ڈگری زیادہ درجہ حرارت ہے، اس کی وجہ یہ ہے کہ اس بار معمول کی ہلکی پھلکی بارشیں نہیں ہوئی ہیں اور آسمان بالکل صاف ہے۔‘ اطلاعات کے مطابق جھلستی گرمی سے مختلف علاقوں میں کئی افراد ہلاک ہوچکے ہیں۔ بی پی یادو کے مطابق عالمی سطح پر درجہ حرارت میں اضافے کا اثر ہندوستان پر بھی پڑا ہے۔’محکمہ موسمیات کے تخمینوں کے مطابق پہلے کی بہ نسبت بھارت کے درجہ حرارات میں اضافہ ہوتا جارہا ہے۔ بھارت کا پچھلا برس گزشتہ سو سالوں میں سب سے زیادہ گرم سال تھا۔‘ مسٹر یادو کا کہنا تھا کہ اترانچل، ہماچل پردیش میں جلد ہی بارش اور یو پی کے بعض علاقوں میں آندھی چلنے کا امکان ہے جس سے درجہ حرارت میں کمی آسکتی ہے۔ لیکن ڈاکٹروں کے مطابق غبار آلود ہوا سے بیماریاں پھیلنے کا خطرہ ہے۔ گزشتہ روز راجستھان کے گنگا نگر شہر میں درجہ حرارت سب سے زیادہ پینتالیس ڈگری تھا۔ دلی بھوپال، گنا اور مہاراشٹر کے کئی شہروں میں بیالیس اور تینتالیس ڈگری درجہ حرارت ریکارڈ کیا گيا ہے۔ محکمہ موسمیات کے مطابق عام طور اپریل کے مہینے میں اس قدر گرمی نہیں ہوتی ہے۔ | 
بارش اور گرمی کا قہر 
