ریاست کے وزیر اعلیٰ کو حالات سے نمٹنے میں ناکامی پر شدید تنقید ہو رہی ہے

وزیراعظم منموہن سنگھ نے تشدد کے واقعات پر گہری تشویش ظاہر کی ہے اورسبھی برادریوں سے امن کی اپیل کی ہے۔گزشتہ پانچ روز سے جاری پر تشدد واقعات میں پچیس افراد ہلاک ہوچکے ہیں۔

احتجاجی مظاہرے اب راجستھان اور ہریانہ سے پھیلتے ہوئے اترپردیش تک پہنچ چکے ہیں۔ ہفتہ کی صبح مظاہرین نے کانپور دلی ریلوے لائن پر ٹریک کو توڑ دیا، جس سے کانپور کے راستے سے دلی آنے والی تقریباً پچیس ٹرینیں راستے میں کھڑی ہیں۔ سانگا نیر میں ایک ریلوے سٹیشن کو آک لگا دی گئی ہے۔ تاہم ریواڑی اور جے پور کے درمیان تین دن بعد ریلوے سروس بحال ہوگئی ہے۔

حساس علاقے  حساس علاقوں میں نیم فوجی دستے تعینات ہیں اور بطور احتیاط اب ہریانہ اور یوپی کی سرحد کو سیل کردیا گیا ہے۔ ہفتہ کی صبح سے نیشنل ہائي وے پر بھی سخت سکیورٹی کے تحت گاڑیوں کی آمد و رفت شروع ہوگئی ہے۔

ریاستی حکومت نے اس تعطل کو دور کرنے کے لیے گوجروں کے ساتھ آج تیسرے دور کی بات چیت شروع کی ہے۔گزشتہ روز حکومت اور گوجر رہنماؤں کے درمیان مذاکرات نا کام رہے تھے۔

پسماندہ طبقہ کی گوجر برادری اپنی شمولیت درج فہرست قبائل میں چاہتی ہے تاکہ اسے ریزرویشن کا فائدہ مل سکے۔ لیکن مینا برادری اس کی سخت مخالف ہے۔ گزشتہ روز دونوں برادریوں کے درمیان جھڑپوں میں پانچ افراد ہلاک ہوگئے تھے اور اب ایسا لگتا ہے کہ یہ معاملہ ان برادریوں کے درمیان تصادم کی شکل اختیار کرگیا ہے۔

ریاست میں بھارتیہ جنتا پارٹی کی حکومت ہے اور اس سے نمٹنے میں ناکام رہنے پر وزیراعلیٰ وسوندھرا رجے سندھیا پر سخت نکتہ چینی ہو رہی ہے۔ ہفتہ کی صبح پارٹی کے صدر راج ناتھ سنگھ اور سینئر رہنما لال کرشن اڈوانی نے وزیراعظم منموہن سنگھ سے ملاقات کی ہے۔

ملاقات کے بعد راج ناتھ سنگھ نے کہا کہ ’ وزیراعظم نے امن کی اپیل کی ہے اور ریاستی حکومت بھی حالات پر قابو پانے میں کوشاں ہے، یہ بھی کوشش ہورہی ہے کہ ہلاک شدہ افراد کی لاشوں کے دفن کرنے کا کام بھی جلدی پورا کر لیا جائے ۔مظاہرین پر پولیس کی فائرنگ سے ایک درجن سے زیادہ لوگ ہلاک ہوئے تھے جن کی لاشوں کو بطور احتجاج دفن نہیں کیا گيا ہے۔