پروفیسر جی وی لوگا ناتھن بچپن ہی سے بہت ذہین طالب علم تھے

یونیورسٹی میں جہاں فائرنگ کا واقعہ ہوا ہے، پروفیسر لوگاناتھن وہیں ایک کلاس میں طلباء کو درس دے رہے تھے۔ یونیورسٹی کے حکام کے مطابق واقعے کے بعد سے ایک بھارتی طالبہ کے لاپتہ ہونے کی بھی خبر ہے۔ وریجینیا یونیورسٹی میں بھارتی طلبہ کی ایک بڑی تعداد زیرتعلیم ہے۔

چینئی میں پروفیسر ناتھن کے اہل خانہ نے بی بی سی اردو ڈاٹ کام کو بتا یا ہے کہ انہیں اس کی اطلاع پہلے ٹی وی پر نشر کی جارہی خبروں سے ہوئی تھی تاہم بعد میں جب فون پر رابطہ کیا گیا تو امریکی حکام نے بھی اس کی تصدیق کر دی۔

پروفیسر جی وی لوگا ناتھن کا تعلق ریاست تمل ناڈو سے تھا اور وہ وریجینیا یونیورسٹی کے انجینیئرنگ فیکلٹی میں ’سول اینڈ انوائرمنٹل انجینیئرنگ‘ کے شعبہ میں پروفیسر تھے۔

اکیاون سالہ پروفیسر لوگاناتھن سنہ انیس سو بیاسی سے ورجینیا میں استاذ کی حیثیت سے خدمات انجام دے رہے تھے۔ انہوں نے مدراس یونیورسٹی سے انجینیئرنگ میں ڈگری لی تھی اور کانپور آئی آئی ٹی سے پوسٹ گریچویشن کیا تھا۔ انہوں نےامریکہ کی پرڈیو یونیورسٹی سے پی ایچ ڈی کی تھی۔

شوٹنگ کے واقعے کے بعد ممبئی کی ایک طالبہ منال پنچل لا پتہ ہیں۔ پنچل کا پروفائل آرکٹ ویب سائٹ پر بھی دستیاب ہے جس کے مطابق وہ ایک آرکٹیکٹ ہیں۔ ابھی یونیورسٹی کی طرف سے متاثرین کی لسٹ جاری نہیں کی گئی ہے۔ آرکٹ پر پنچل کی سلامتی کے لیے دعائی کی جا رہی ہیں۔