ریحانہ بستی والا بی بی سی اردو ڈاٹ کام، ممبئی

	ٹاٹا کینسر میموریل ہسپتال جہاں مبینہ طور پر لڑکی کی عصمت دری کی گئی

بھوئیواڑہ پولیس نے لڑکی اور اس کے والدین کی شکایت پر نامعلوم افراد کے خلاف تعزیرات ہند کی دفعات 376, 509 ,34 کے تحت مقدمہ درج کیا ہے۔

پولیس نے ہسپتال کے دو وارڈ بوائز کو حراست میں لیا ہے اور ان سے تفتیش جاری ہے۔ دوسری طرف ریاست کے نائب وزیراعلیٰ آر آر پاٹل نے اس کیس کی تفتیش کا حکم دیا ہے۔

ٹاٹا ہسپتال کینسر کے علاج کے لیے انڈیا کا سب سے بڑا ہسپتال ہے جہاں روزانہ ہزاروں مریض ملک کے مختلف کونوں سے آتے ہیں۔

مبینہ جنسی زیادتی کا نشانہ بننے والی پانچ ماہ کی حاملہ لڑکی نے پولیس کو دیے ایک بیان میں کہا ہے کہ اسے آپریشن سے قبل بے ہوشی کی دوا سنگھائی گئی تھی اور اس دوران اسے دھندلا یاد ہے کہ وہاں موجود وارڈ بوائز کچھ فحش باتیں کر رہے تھے، اس کے بعد اُسے کچھ یاد نہیں۔

	بھوئیواڑہ پولیس سٹیشن جہاں وارڈ بوائز کو رکھا گیا ہے

ان کا کہنا تھا کہ ہسپتال میں ان کی بچی کے ساتھ جو کچھ ہوا وہ باعث شرم ہے۔ ان کا خاندان کسی کو منہ دکھانے کے قابل نہیں رہا۔ وہ مہاراشٹر کے نائب وزیراعلیٰ آر آر پاٹل سے انصاف کا مطالبہ کرتی ہیں۔

لڑکی کی والدہ کا کہنا تھا کہ بیٹی کے حاملہ ہونے کے بارے میں انہیں بروقت اس لیے علم نہیں ہو سکا کیونکہ ان کی بیٹی کو قے ہونے کی شکایت کی تھی جسے ڈاکٹروں نے بیماری کا حصہ کہہ کر ٹال دیا تھا اب جبکہ لڑکی کے حاملہ ہونے کا کیس سامنے آیا تو انہوں نے ڈاکٹر سے بات کی جس پر ڈاکٹر نے جواب دیا کہ آپریشن کے بعد ان کا فرض پورا ہو گیا تھا۔

ڈپٹی پولیس کمشنر دتا تریہ کرالے کا کہنا ہے کہ پولیس نے کیس درج کر لیا ہے اور تفتیش جاری ہے۔ انہوں نے بتایا کہ لڑکی کو گزشتہ سال نومبر میں علاج کے لیے ہسپتال لایا گیا تھا۔ اگر وہ پانچ ماہ کی حاملہ ہے تو یہ بات طے ہے کہ جو کچھ ہوا وہ ہسپتال میں ہوا کیونکہ اس دوران وہ ہسپتال کے بستر پر تھی۔

ٹاٹا ہسپتال کے ترجمان ڈاکٹر امبو منی کا کہنا ہے کہ کیس کی تفتیش جاری ہے۔ پولیس کے ساتھ مکمل تعاون کیا جا رہا ہے۔ اگر ہسپتال کے عملہ میں کوئی اس کا ذمہ دار پایاگیا تو اس کے خلاف سخت کارروائی کی جائے گی۔