گزشتہ سال مئی میں کشمیر کے ضلع ڈوڈہ میں بھی ہلاکتیں ہوئی تھیں (فائل فوٹو)

اس واقعے میں دیگر چار افراد زخمی بھی ہوئے ہیں۔

جموں کے انسپکٹر جنرل آف پولیس ایس پی وید نے بتایا ہے کہ جمعرات کی رات گئے چار مسلح افراد نے راجوری ضلع کے پنگلار گاؤں میں ایک مکان پر حملہ کیا۔ مکان میں گیارہ مزدور تھے جن پرگولیاں چلائی گئیں۔

پولیس کے مطابق اس واقعے میں پانچ ہندو ہلاک اور چار زخمی ہوئے ہیں۔ دو افراد فرار ہونے میں کامیاب ہوگئے۔ زخمیوں کو ہسپتال میں داخل کیا گیا ہے۔ پولیس کا کہنا ہے کہ شدت پسند بھی فرار ہونے میں کامیاب ہوگئے۔

اس واقعے کا پتہ جمعہ کو اس وقت چلا جب گاؤں والوں نے ایک قریبی فوجی چوکی کو اس کی اطلاع دی۔ فوج نے عسکریت پسندوں کی تلاش کے لیے آپریشن شروع کیا ہے۔ ابھی تک کسی بھی گروپ نے اس واقعے کی ذمہ داری قبول نہیں کی ہے۔

جموں کے علاقے میں اس طرح کا واقعہ کافی دنوں بعد ایک ایسے وقت پیش آيا ہے جب جموں کشمیر سے فوج کے انخلاء کے مسئلے پر بات چیت ہورہی ہے۔ چند روز قبل جموں کے ایک سرحدی گاؤں میں ہندو مسلم فرقہ وارانہ فسادات بھڑک اٹھے تھے جس کے بعد علاقے میں کرفیو نافذ کر دیا گیا تھا۔

ریاست میں حکمراں اتحاد میں شامل پیپلز ڈیمو کریٹک پارٹی کا مطالبہ ہے کہ جموں کشمیر میں حالات بہتر ہوگئے ہیں اس لیے خطے سے فوج کو ہٹا لینا چاہیے۔ تاہم کانگریس کا کہنا ہے کہ ابھی حالات اس طرح کے سازگار نہیں کہ فوج کو ہٹا لیا جائے۔ اس مسئلے پر دونوں میں رسہ کشی بھی جاری ہے۔