خدیجہ عارف بی بی سی اردو ڈاٹ کام، دِلّی

	حکومت کی یقین دہانی کے باوجود نندی گرام میں کشیدگی برقرار ہے۔

دلی میں ایک پریس کانفرنس سے خطاب کرتے ہوئے مارکسوادی کمیونسٹ پارٹی پولٹ بیورو کے جنرل سیکریٹری پرکاش کرات نے کہا کہ نندی گرام میں کشیدگی افسوسناک ہے، لیکن اس پتہ چلتا ہے کہ وہاں کی عوام حکومت کے ساتھ نہیں ہے۔

پرکاش کرات کا کہنا ہے کہ نندی گرام میں ریاست کی حزب اختلاف کی اہم جماعت ترنمول کانگریس اور نکسلی باغی کشیدگی کو ہوا دے رہے ہیں اور اس وجہ سے زمین کے معاملے پر نندی گرام کی عوام ہماری مخالف ہوگئی۔

دوسری جانب حزب اختلاف کی جماعت بھارتیہ جنتا پارٹی نے نندی گرام مسئلے پر حکومت پر مغربی بنگال حکومت کو برخاسات کرنے کا مطالبہ کرتے ہوئے پارلیمان کی کارروائی میں مسلسل چوتھے روز رخنہ ڈالا جس کے بعد سپیکر نے ایوان کی کارروائی کل تک کے لیے ملتوی کردی۔

مارکسوادی کمیونسٹ پارٹی پولٹ بیورو کے ممبر سیتا رام یچوری نے کہا کہ حزب اختلاف کی جماعت کو نندی گرام کے معاملے میں کوئی دلچسپی نہیں وہ صرف اس معاملے پر سیاست کررہی ہے۔

نندی گرام میں اقتصادی زون کی تشکیل کے فیصلے کے بعد وہاں کے کسانوں نے سخت احتجاج کیا تھا جس کے بعد ریاستی حکومت نے اعلان کیا تھا کہ نندی گرام میں خصوصی اقتصادی خطے نہیں بنائے جائيں گے اور کسانوں سے ان کی زمین نہیں لی جائے گی۔

حکومت کی اس یقین دہانی کے باوجود نندی گرام میں کشیدگی برقرار ہے۔
مغربی بنگال کے نندی گرام علاقے میں گزشتہ بدھ کو کسان کیمیائی صنعت کے لیے زمین کی الاٹمنٹ کی تجویز کی مخالفت میں احتجاجی مظاہرہ کر رہے تھے۔ اس دوران پولیس نے بے قابو ہجوم پر فائرنگ کی تھی۔

اس واقعہ میں چودہ افراد ہلاک جبکہ ستّر زخمی ہوگئے تھے۔ کولکاتہ ہائی کورٹ نے اس واقعہ کی سی بی آئی سے تفتیش کرانے کے احکامات جاری کر دیے ہیں۔