نادیہ پرويز بی بی سی اردو ڈاٹ کام، دلّی

	پولیس شک کی بنیاد پر چھ مقامی افراد سے پوچھ گچھ کر رہی ہے

الہ آباد شہر میں لڑکیوں کا یہ پہلا مدرسہ ہے اور یہاں تقریباً 55 لڑکیاں رہتی ہیں۔

مقامی سماجی کارکن اور استاد محترمہ پدما نے بی بی سی کو بتایا ’بدھ کو دو لڑکیوں کو نصف شب کے قریب مدرسے سے زبردستی اٹھایا گیا اور مدرسے کے نزدیکی میدان میں چھ افراد نے ان سے جنسی زیادتی کی‘۔ ان کا کہنا تھا کہ مذکورہ افراد نے اپنے آپ کو تفتیشی ادارے سی آئی ڈی کے اہلکار ظاہر کیا تھا۔

پولیس کے سینئر اہلکار بی ڈی پالسن نے بی بی سی کو بتایا ہے کہ پولیس شک کی بنیاد پر چھ مقامی افراد سے پوچھ گچھ کر رہی ہے۔ انہوں نے بتایا کہ متاثرہ لڑکیوں کا طبی معائنہ کروایا جا چکا ہے اور اب رپورٹ کا انتظار ہے۔

اطلاعات کے مطابق یہ مدرسہ گزشتہ برس بنارس ميں ہونے والے بم دھماکوں کے اہم ملزم کے بھائی کا ہے۔ جب مسٹر پالسن سے یہ پوچھا گیا کہ کیا پولیس کی کوئی ٹیم وہاں پوچھ گچھ کرنے کے لیے گئی تھی تو انہوں نے اس سے صاف طور پر انکار کر دیا۔ ان کا کہنا تھا کا ان کے پاس ایسی کوئی اطلاع نہیں ہے کہ پولیس کی کوئی ٹیم مدرسے میں گئی ہے۔

کانگریس کی رہنما ریتا بہوگنی جوشی نے اس حادثے کا ذمے دار ریاست میں جاری لاقانونیت کو ٹھہرایا ہے۔ اس معاملہ کے سامنے آنے کے بعد اتر پردیش میں امن و امان کی صورتحال اور جرائم کے حوالے سے حکومت پر کی جانے والی تنقید میں بھی اضافہ ہوا ہے۔ یاد رہے کہ نٹھاری گاؤں میں انسانی ہڈیوں کی برآمدگی کے بعد سے ریاست میں جاری لاقانونیت پر پہلے سے ہی سوالات اٹھ رہے ہیں۔