ووڈا فون کو ہندوستان میں نئے چیلنج کا سامنا ہے

بھارت میں مواصلات کی صنعت تیزی سے ترقی کر رہی ہے۔ برطانوی کمپنی ووڈا فون نےگزشتہ ہفتے ہچسن ایسار کمپنی کا بیشتر حصہ خریدنے کا ارادہ ظاہر کیا تھا لیکن اب بھارتی کمپنی ایسار جس کے پاس ہچسن ایسار کا 33 فی صد حصہ ہے خود اسی نے بقیہ حصہ خریدنے کی پیش کش کی ہے۔

ہانگ کانگ کی کمپنی ہچسن ٹیلی کام کا کہنا ہے کہ کئی کمپنیاں اس کے 67 فی صد حصص پر نظر رکھے ہوئے ہیں۔

ہچسن ٹیلی کام کا تھائی لینڈ اور اسرائیل جیسے ممالک میں بھی نیٹ ورک ہے لیکن اسے سب سے زيادہ یعنی تقریبًا اسّی فیصد آمدنی ہندوستان سے ہوتی ہے۔

یہ کمپنی ہچسن وامپوآہ کارپوریشن کا ایک حصہ ہے۔ کمپنی یہ اعلان پہلے ہی کرچکی ہے کہ وہ چودہ ارب ڈالر یعنی سات سو ارب روپے سے زيادہ کی قیمت پر ہی غور کرے گی۔ برطانیہ کے بعض اخبارات کے مطابق ایسار کمپنی نے ہچسن کے پورے کاروبار کو تقریبا نوسو ارب روپے میں خریدنے کی پیش کش کی تھی۔

فی الوقت ہندوستان میں ووڈا فون کے پاس بھارتی ائرٹیل کا دس فیصد حصہ ہے۔ انڈیا میں بھارتی ائر ٹیل ٹیلی مواصلات کے شعبے میں سب سے مقبول کمپنی ہے۔

ہندوستان میں بیرونی کمپنیوں کو ٹیلی مواصلات کے شعبے میں صرف 74 فیصد سرمایا کاری کی اجازت ہے۔