عدالت نے سنجے کو انیس دسمبر تک ضمانت دی تھی (فائل فوٹو)

عدالت نے سنجے دت کو دہشت گردی کے الزام سے تو بری کر دیا تھا لیکن انہیں غیر قانونی اسلحہ رکھنے کا مجرم قرار دیا تھا۔ عدالت نے سنجے دت کو ان کی درخواست پر انیس دسمبر تک ضمانت دے دی تھی۔

ضمانت کی معیاد ختم ہونے سے ایک روز قبل سنجے دت نے عدالت میں یہ معیاد بڑھانے کی اپیل کی تھی لیکن منگل کو عدالت نے ان کی ضمانت مزید دو روز بڑھاتے ہوئے انہیں 21 دسمبر کو عدالت میں پیش ہونے کا حکم دیا ہے۔

دو گھنٹے تک چلنے والی سماعت کے بعد عدالت نے کہا کہ سنجے دت کی اپیل پر 21 دسمبر کو کوئی فیصلہ کیا جائے گا۔

سنجے دت کی اپیل کے بارے میں ان کی وکیل فرحانہ شاہ نے بتایا ’سنجے ایک فلمی اداکار ہیں اور وہ اپنی فلموں کو ادھورا نہیں چھوڑ سکتے ہیں۔ اگر وہ ایسا کرتے ہیں تو اس سے مالی نقصان کے علاوہ ان کی ساکھ بھی متاثر ہو گی‘۔

فرحانہ شاہ نے مزید بتایا ’سنجے دت امریکہ میں تعلیم حاصل کرنے والی اپنی بیٹی ترشا کے ساتھ کرسمس کی چھٹیاں گزارنا چاہتے ہیں‘۔

ممبئی بم دھماکوں کے سلسلے میں پولیس نے سنجے دت کو گرفتار کر لیا تھا اور تقریبًا 18 ماہ جیل میں گزارنے کے بعد انہیں ضمانت ملی تھی۔

خصوصی عدالت نے 1993 میں ہونے والے بم دھماکوں کے 123 ملزمان میں سے 100 کو قصور وار قرار دیا ہے۔ اطلاعات کے مطابق قصور واروں کی سزاؤں کا اعلان اگلے سال جنوری میں کیا جائے گا۔