ریاض مسرور بی بی سی ڈاٹ کام، سرینگر

	فاروق کا کہنا ہے کہ گرفتاری ان کے خیالات میں طوفان برپا کرنے کا سبب بنی۔

ڈار پچھلے تین روز سے اپنے تیرہ سالہ بھتیجے عاصم شفیع ڈار سے موبائل فون کا استعمال سیکھ رہے ہیں۔

سب کچھ بدل گیا ہے
بی بی سی کے ساتھ ایک طویل گفتگو کے دوران فاروق نے کہا کہ ان کے لئے سب کچھ بدل گیا ہے۔ ’جب میں گرفتار ہوا تو میری تنظیم ایک مسلح گروپ تھا، اب وہ ایک سیاسی جماعت ہے۔ یہاں ٹیکنالوجی کا دور دورہ ہے۔ یہ الگ بات ہے کہ جس مقصد کے لئے میں نے بندوق اُٹھائی تھی وہ تو ابھی تک حاصل نہیں ہوا لیکن لوگوں کے رہن سہن میں تبدیلی ضرور آئی ہے۔‘

غور طلب ہے کہ خود فاروق کے گھر میں کوئی تبدیلی نہیں آئی ہے۔ فاروق وسط سرینگر کے محلہ گُروبازار میں اُسی بوسیدہ اور تباہ حال مکان میں رہتے ہیں جو اُن کے والد نے پچاس سال قبل تعمیر کیا تھا۔

	بھتیجے سے موبائل فون کا استعمال سیکھتے ہوئے

عسکریت کی طرف رجحان
بیس سال پہلے کے حالات کو یاد کرتے ہوئے فاروق ڈار کہتے ہیں کہ وہ جب اپنے گھر کے قریب رگھوناتھ پبلک سکول میں پڑتے تھے تو سرینگر میں ہونے والے عالمی کرکٹ مقابلے کے خلاف انہوں نے شہر میں پوسٹر چسپاں کیے تھے۔ یہ مقابلہ اُنیس سو تراسی میں یہاں کے شیرِ کشمیر کرکٹ سٹیڈیم میں ہندوستان اور آسٹریلیا کے درمیان ہوا تھا۔ اسکے تین سال بعد یعنی اُنیس سو ستاسی میں جب کئی علیٰحدگی پسند گروپوں کے اتحاد مسلم متحدہ محاذ نے الیکشن لڑنے کا فیصلہ کیا تو فاروق کو پہلی بار مقامی پولیس نے گرفتار کیا۔

وہ کہتے ہیں: ’ستاسی کے الیکشن کا اعلان ہوا تو نیشنل کانفرنس کے ایک لیڈر محمد سلطان نے مجھے نوکری اور بڑی رقم کی پیشکش کی جو میں نے ٹھکرا دی۔ ہندوستان نواز قوتوں کو خدشہ لاحق تھا کہ (مسلم متحدہ) محاذ تمام سیٹوں پر فتح حاصل کرےگا۔ پیشکش ٹھکرانے کے چوبیس گھنٹے بعد مجھے گرفتار کرکے سینٹرل جیل پہنچایا گیا۔‘

	ہم نے قرض کر کے لدھیانہ سے جرابیں بنانے کی مشین خرید لی تھی۔ بٹہ سکول سے آتا تو جرابین بازار میں بیچتا تھا۔ وہ گرفتار ہوا تو مشینین بیچ دیں۔

’جیسا ہمارا ویسا ہی پنڈتوں کا‘
فاروق کو بائیس جون اُنیس سو نوّے کو پائین شہر کے چھتہ بل علاقے میں اپنے دو محافظوں سمیت گرفتار کر لیاگیا۔ گرفتاری کے دو ماہ بعد لوگ اُس وقت دنگ رہ گئے جب فاروق کو سرکاری ٹی وی ’دور درشن‘ پر یہ اقرار کرتے دکھایا گیا کہ انہوں نے متعدد کشمیری پنڈتوں کا قتل کیا۔ اس حوالے سے فاروق کا کہنا ہے کہ عدالت نے انہیں تمام الزامات سے بری کر دیا ہے۔

اُس وقت کے ریاستی گورنر جگموہن کو آر ایس ایس کا دیرینہ ہمدرد قرار دیتے ہوئے فاورق الزام لگاتے ہیں کہ جگموہن نے ہی پنڈتوں کی ہجرت کا منصوبہ بنایا۔ فاروق اپنے الزام کے حق میں معروف دانشور بلراج پوری کی کتاب ’کشمیر ٹوورڈز انسرجنسی‘ اور سابق وزیر اعلیٰ ڈاکٹر فاروق عبدللہ کے ایک انٹرویو کا حوالہ دیتے ہیں۔ فاروق کہتے ہیں کہ ’جیسے کشمیر ہمارا ہے ویسا ہی پنڈتوں کا بھی ہے۔ میں نے تو رگھوناتھ سکول میں پڑھا ہے، میرے پنڈت ہم جماعتوں کو معلوم ہے کہ اس ساری سازش کے پیچھے کون لوگ ہیں۔‘

	بٹہ کراٹے اپنے والدین، بھابی اور بھتیجے کے ساتھ

تفتیشی مراکز میں فورسز کے ہاتھوں متعدد بار تشدد کی وجہ سے فاروق کئی امراض میں مبتلا ہو گئے ہیں۔ ان کے ڈاکٹروں کا کہنا ہے کہ ان کی بینائی بہت زیادہ متاثر ہوچکی ہے۔ ڈاکڑوں کو خدشہ ہے کہ فاروق کی ہڈیوں میں کیلشیم کی کمی کی وجہ سے وہ آسٹیوپوروسز نامی مرض میں بھی مبتلا ہوسکتے ہیں۔

ان کے دوستوں کا کہنا ہے کہ ’بیسیوں لڑکوں کو جُوڈو اور کراٹے سکھانے والا بٹہ آج دوقدم چلتے ہی ہانپ جاتا ہے۔‘ واضح رہے فاروق مارشل آرٹ کے شوقین تھے اور کئی مقابلوں میں حصہ بھی لے چکے تھے۔

قید کے دنوں کے بات کرتے ہوئے فاروق کا کہنا تھا کہ انہوں نے جموں کی کوٹ بلوال جیل میں قیدیوں کو ناقص غذا دینے کے خلاف چودہ ماہ تک بھوک ہڑتال کی تھی۔ ’مجھے زبردستی ناک کے ذریعہ غذا دی جاتی تھی جسکی وجہ سے میری غذا کی نالی میں بھی نقائص پیدا ہوگئے۔‘

فاروق کہتے ہیں کہ کشمیری نظربندوں کے ساتھ غیرانسانی سلوک کیا جاتا ہے اور جموں کی جیلوں میں انہیں بدمعاشوں اور مجرموں کے ساتھ رکھا جاتا ہے۔ جیل میں اپنے تجربات بیان کرتے ہوئے فاروق کہتے ہیں کہ، ’مجھے تو کبھی کبھی ایسا لگتا تھا کہ میں جیل میں ہی پیدا ہوا ہوں اور یہیں میری موت ہوگی۔‘