شکیل اختر بی بی سی اردو ڈاٹ کام، دلی

	ان معاملات میں جارج فرنانڈس کو ایک بار پہلے بے قصور قرار دیا جاچکا ہے

تہلکہ ‏ نیوز ویب سائٹ کی خفیہ رکارڈنگ کے تقریبا پانچ برس بعد سی بی آئی نے حالیہ برسوں میں مختلف دفاعی سودوں میں کمیشن اور رشوت خوری کے الزامات کے سلسلے میں کم از کم پینتیس مقامات پر چھاپے مارے ہیں۔

سی بی آئی کے ترجمان جی موہنتی نے بتایا کہ اسرائیل سے براک مزائیلوں کی خریداری کے سلسلے میں سابق وزیر دفاع جارج فرنانڈس اور ان کی پارٹی کے صدر جیا جیٹلی اور بحریہ کے سابق سربراہ ایڈمرل سشیل کمار کے خلاف رشوت خوری کا معاملہ درج کیا گیا ہے۔ انہوں نے مزید کہا اس سودے کے لیئے ایک بڑی رقم کمیشن کے طور پر ادا کی گئی تھی۔ ’سمتا پارٹی کی صدر کو جو وزیر دفاع کے گھر سے کام کرتی تھیں ایک ایجنٹ نے دو کروڑ روپے اور پارٹی کے خزانچی کو کئی لاکھ روپے دیئے تھے‘۔

تفتیشی ادارے کی ترجمان نے بتایا کہ اس سودے کے اصل ایجنٹ کو بھی اس مقدملے میں ملزم بنایا گیا ہے۔ سی بی آئی نے بیشتر چھاپے دفاعی سودوں کے ڈیلروں کی رہائش گاہوں اور دفاتر پر مارے ہیں۔

سابق وزیر دفاع جارج فرنانڈس نے سی بی آئی کے الزامات کو مسترد کردیا ہے۔ انہوں نے کہا کہ سی بی آئی حکمراں کانگریس پارٹی کے اشارے پر کام کر رہی ہے۔ ’سونیا تہلکہ کی ماں ہیں۔ اور میں انہں چنوتی دیتا ہوں کہ وہ یہ ثابت کریں کہ وہ میں ہی ہوں جسے پیسہ دیا گیا‘۔

ہندوستان میں مجرمانہ معاملات میں قصور ثابت ہونے کی جو شرح ہے اس کے پیش نظر اس معاملے میں بھی کسی نتیجے کی صرف امید کی جا سکتی ہے۔ سندیپ دیکشت

دفاعی تجزیہ کاروں کا خیال ہے کہ ہندوستان میں دفاعی سودوں میں عموماً شفافیت نہیں ہوتی اور وہ بہت ہی رازداری میں کیئے جاتے ہیں ۔ تجزیہ کار سندیپ دیکشت کہتے ہیں کہ ’ہندوستان میں مجرمانہ معاملات میں قصور ثابت ہونے کی جو شرح ہے اس کے پیش نظر اس معاملے میں بھی کسی نتیجے کی صرف امید کی جا سکتی ہے‘۔

یہ بات بھی دلچسپ ہے کہ ان معاملات میں جارج فرنانڈس کو ایک بار پہلے بے قصور قرار دیا جاچکا ہے۔