خدیجہ عارف بی بی سی اردو ڈاٹ کام، دلی

	یہ بل قانون بننے سے قبل ہی تنازعہ کا موضوع بنا ہوا ہے

تبدیل مذہب سے متعلق قانون کے اس مسودے کو حزب اختلاف کی شدید مخالفت کے باوجود گجرات اسمبلی منظور کر چکی ہے لیکن ابھی اسے قانون کی شکل لینے کے لیئے گورنر کی منظوری ملنی باقی ہے۔

سرکاری طور پر اس مجوزہ قانون کا مقصد زور زبردستی اور پیسے کے لالچ دے کر تبدیلی مذہب کو روکنا ہے لیکن اقلیتی طبقے کے رہنماؤں کا خیال ہے کہ یہ بنیادی طور پر ہندؤں اور قبائلی آبادی کے عیسائی اور اسلام مذہب اختیار کرنے کے عمل کو مزیدہ پیچیدہ کرنا ہے۔

یہ بل قانون بننے سے قبل ہی تنازعہ کا موضوع بنا ہوا ہے۔ اس بل میں جین اور بدھ مذہب کو ہندو مذہب کا حصہ بتایاگیا ہے۔

آل انڈیا کانفرنس آف شیڈیول کاسٹ اینڈ شیڈول ٹرائیب اور آل انڈیا کرسچن کونسل نے اس ماہ کی چودہ اور پندرہ تاریخ کو ناگپور میں اس مجوزہ قانون کے خلاف ایک بڑی احتجاج ریلی کرنے کا اعلان کیا ہے۔ بدھسٹ رہنما ادت راج نے بتایا کہ ’گجرات حکومت کا یہ مجوزہ قانون انسان کی آزادی پر سیدھا حملہ ہے۔ ہندوستان کے قانون کے مطابق کوئی بھی ریاستی حکومت آئین میں کوئی بھی حکومت دخل اندازی نہ کرسکتی ہے اور نہ ہی کوئی مذہب حکومت کے کاموں میں روکاؤٹ بن سکتا ہے۔ ایسے حالات میں ہمارے ملک کا سیکیولر آئین خطرے میں ہے‘۔

ڈاکٹر ادت راج کا کہنا تھا کہ اس قانون کی مخالفت میں چودہ اور پندرہ اکتوبر کو ناگ پور میں دنیا بھر سے بڑے بڑے دانشور ، مذہبی رہنما شرکت کريں گے۔ اسی دن اس بل کی مخالفت میں ہزاروں دلت احتجاج کے طور پر ہندو مذہب چھوڑ کر بدھ مذہب اپنائیں گے۔ ادت راج کے مطابق ’قانون دلتوں کے خلاف ہے، عیسائیوں کے خلاف ہے اور آزادی کے خلاف ہے‘۔ انھوں نے مزید کہا ہے کہ یہ قانون اس لیئے بنایا گیا ہے تاکہ لوگ اپنے پسند سے اپنا مذہب تبدیل نہ کر سکیں۔

سونیا کی درخواست  گزشتہ ہفتے کانگریس کی صدر سونیا گاندھی نے بھی صدر سے ایک خط کے ذریعے یہ گزارش کی تھی کہ اس قانون کو منسوخ کر دیا جائے۔

اس قانون کے خلاف جین مذہب کے ماننے والے بھی احتجاجی مظاہرے کر رہے ہیں اور بعض رہنماؤں نے غیر معینہ مدت کی بھوک ہزتال بھی شروع کی ہے۔ ان کا مطالبہ ہے کہ اس قانون کو واپس لیا جائے ورنہ ان کا احتجاج جاری رہے گا۔ ڈاکٹر ادت راج اور کئی عیسائی رہنماؤں نے وزير اعظم منموہن سنگھ اور صدر عبد الکلام کو ایک خط لکھ کر یہ درخواست کی ہے کہ وہ جلد سے جلد حکومت کو اس قانون میں ترمیم کرنےکے لیئے ہدایات جاری کریں۔

گزشتہ ہفتے کانگریس کی صدر سونیا گاندھی نے بھی صدر سے ایک خط کے ذریعے یہ گزارش کی تھی کہ اس قانون کو منسوخ کر دیا جائے۔