ریحانہ بستی والا بی بی سی اردو ڈاٹ کام، ممبئی

	1993 میں پلازہ تھیڑ کی عمارت بم دھماکوں کے بعد

انیس سو ترانوے میں ہونے والے اس بم دھماکے میں دونوں ملزمان کو عدالت نے دھماکہ خیز مواد رکھنے کا مجرم تو قرار دیا ہے لیکن ان کی سزا کا تعین یہ کہتے ہوئے فی الوقت نہیں کیا کہ اس کا فیصلہ دیگر ملزمان کے ساتھ مقدمہ کے آخر میں کیا جائے گا۔

جسٹس پرمود دتاتریہ کوڈے نے انڈیا کی تاریخ کے سب سے طویل مقدمہ کا فیصلہ بارہ ستمبر سے سنانا شروع کیا تھا اور اب تک عدالت سات ملزمان کو قصوروار قرار دے چکی ہے اور تین کو ناکافی ثبوت کی بنا پر بری کیاہے۔

اصغر مقادم اور شاہنواز قریشی پر الزام ہے کہ انہوں نے دادر میں واقع پلازہ تھیٹر پر دھماکہ خیز مواد سے بھری کار کھڑی کی تھی۔

مشہور فلمساز وی شانتا رام کے اس تھیٹر میں ہونے والے دھماکے میں دس افراد ہلاک اور چھتیس زخمی ہوئے تھے۔

’سی بی آئی‘ کے مطابق اصغر مقادم، ٹائیگر میمن کا بزنس مینیجر تھا اور پولیس نے دھماکہ کے فورا بعد انہیں گرفتار کیا تھا۔

اصغر مقادم نے جو اقبالی بیان دیا اس میں انہوں نے اپنے ایک قریبی رشتہ دار شعیب گھنسار ، پرویز شیخ انور تھیبہ اور مشتاق ترانی کے ساتھ شہر کی تین بڑی ہوٹلوں میں دھماکہ خیر مواد سے بھرے سوٹ کیس پہنچائے تھے۔

انہوں نے اپنے بیان میں بتایا تھا کہ جب وہ واپس ماہم کی الحسینی بلڈنگ پہنچے تو انہیں ٹائیگر میمن کے اہم سرغنہ جاوید چکنا نے ’آر ڈی ایکس‘ سے بھری ماروتی کار دی کہ وہ اسے شاہنواز کے ساتھ جا کر پلازہ تھیٹر کے پاس کھڑی کرے۔

اصغر پر اس کے علاوہ شیکھاڑی کے ساحل پر اسلحہ اتارنے اور اسے شہر میں پہنچانے کا بھی الزام تھا۔

لیکن جسٹس کوڈے نے ان پر بم رکھنے کا جرم ثابت ہونے کا حکم سنایا ہے اور قرار دیا ہے کہ ان پر اسلحہ اتارنے اور پاکستان جا کر تربیت لینے یا دبئی میں سازش کا جرم ثابت نہیں ہو سکا۔

اس عدالت نے گزشتہ جمعہ کو زویری بازار میں بم رکھنے کے الزام میں ایک ملزم شعیب گھنسار کو قصوروار قرار دیا تھا۔ شعیب نے عدالت سے رحم کی اپیل کرتے ہوئے کہا تھا کہ وہ ایک عزت دار خاندان کا فرد ہے اس کی بوڑھی ماں ہے اور ایک لڑکی گزشتہ تیرہ برس سے اس کی واپسی کی منتظر ہے اور وہ ان سے رہائی کے بعد شادی کر سکے گا۔

سرکاری وکیل اجول نکم کا کہنا ہے کہ وہ بم نصب کرنے والے تمام ملزمان کے لیے عدالت سے موت کی سزا کا مطالبہ کریں گے۔ جیسا کہ ان کے بقول انہوں نے میمن خاندان کے قصوروار ملزمان کے لیے کیا ہے۔

عدالت نے اب تک ٹائیگر میمن کے بھائی یوسف میمن ، عیسیٰ میمن ، یعقوب میمن اوران کی بھابھی روبینہ میمن کے بعد شعیب گھنسار کو مجرم قرار دیا ہے۔

اس مقدمہ میں نامزد ملزمان کی تعداد 123 ہے اور ایک ہفتہ میں صرف گیارہ ملزمان کی قسمت کا فیصلہ ہو سکا ہے اور قانونی ماہرین کا خیال ہے کہ اس کارروائی کو مکمل ہونے میں شاید مزید دو ماہ کا وقت لگے گا۔