صلاح الدین بی بی سی اردو ڈاٹ کام، دلی

	نئے نظام سے قریباً پچاس ہزار قیدیوں کو فائدہ ہوگا

حکومت نے اس نظام میں کئی اہم تبدیلیاں کی ہیں اور ماہرین کا کہنا ہے ان نئی تبدیلیوں سے قیدیوں کے ساتھ ساتھ جیلوں کی بھی حالت بھی بہتر ہونے کی امید ہے۔

حکومت نے فوجداری نظام انصاف میں ایک نئی اور اہم دفعہ ’436 اے‘ کا اضافہ کیا ہے۔ تعزیراتِ ہند کی اس دفعہ کے تحت ایسے مقدمات کے علاوہ جن میں عمر قید کی سزا ممکن ہو، کسی بھی مقدمے میں جو سزا تجویز کی گئی ہے اس کی آدھی مدت سے زیادہ ملزم کو جیل میں نہیں رکھا جا سکے گا۔ یعنی اگر کسی جرم کی سزا چھ سال ہے تو تین برس سے پہلے ملزم کے مقدمے کا فیصلہ ہوجانا چاہیئے ورنہ تین برس کے بعد اسے ہر صورت میں ضمانت پر رہا کرنا ہو گا۔ تاہم جن مقدمات میں عمر قید کی سزا دی جا سکتی ہے وہ اس قانون سے مستثنٰی ہوں گے۔

حکومت نے کرمنل جسٹس سسٹم کے قوانین میں یہ تبدیلیاں گزشتہ برس کی تھیں تاہم ان کا نفاذ تیئس جون دوہزار چھ سے ہوا ہے۔

وزیر داخلہ شیو راج پاٹل نےان تبدیلیوں کی تفصیلات بتاتے ہوئے کہا کہ’ کرمنل جسٹس سسٹم کی اصلاحات کے عمل میں یہ ایک مثبت قدم ہے۔ اس سے معاملے کی تفتیش جلد ہوگی، مقدمے کی سماعت کی پوری مشینری مضبوط ہوگی اور بہت سے زیرِ سماعت مقدمات جلدی حل ہوں گے‘۔

فی الوقت ہندوستان کی مختلف جیلوں میں ہزاروں افراد محض اس لیئے جیل میں قید ہیں کیونکہ ان کے مقدمے کی سماعت برسوں سے جاری ہے اور کوئی فیصلہ نہیں ہو پایا ہے۔ جیل اصلاحات کے لیئے مشہور سینیئر پولیس افسر کرن بیدی کا کہنا ہے کہ پولیس، عدلیہ اور گواہ سبھی اپنے اپنےعذر پیش کرتے رہتے ہیں جس سے ’کرمنل جسٹس سسٹم‘ سست روی کا شکار رہا ہے لیکن اب اس میں تیزی آئےگي۔

ان کا کہنا تھا کہ’اس سے پولیس پر تفتیش تیز کرنے کا سخت دباؤ ہوگا،عدالتیں بھی جلدی فیصلہ کریں گی اور یہ سماج کے لیئے بھی ایک پیغام ہے کہ وہ فوجداری معاملات میں انتظامیہ کی مدد کرے‘۔

سابق چیف جسٹس آف انڈیا جے ایس ورما کا کہنا ہے کہ قانون میں نئی تبدیلیوں سے قیدیوں اور جیلوں کی اصلاح تو ہوگي لیکن صرف یہی کافی نہیں ہے۔ انہوں نے کہا کہ’جیل میں اصلاحات، قیدیوں کی حالات بہتر بنانے اور انسانی حقوق کا خیال رکھنے کے لیئے ابھی اور بہت کچھ کرنے کی ضرورت ہے‘۔

اس وقت انڈیا کی مختلف جیلوں میں لاکھوں لوگ قید ہیں جن میں سے بہت سے ایسے بھی ہیں جن کے جرم کی سزا محض پانچ یا چھ برس ہے لیکن ان کا مقدمہ ختم نہ ہونے کے سبب وہ کئی برس سے جیل میں پڑے ہیں۔ ماہرین کا کہنا ہے کہ تقریباً پچاس ہزار قیدی اس نئے قانون سے فائدہ اٹھا سکیں گے۔